صوت المعلق الرياضي له سحر غريب بيخليك تتابع المباراة رغم إنك ممكن ما تكونش مهتم بالكورة أصلاً، ولا حتى فاهم الفرق بين ضربات الجزاء والفاول.
بمجرد ما تعدي جنب شاشة التليفزيون أو تسمع صوت المعلق في الراديو وهو بيعلق على المباراة، فجأة بتحس إنك عايز تقعد وتشوف الماتش وتشوف المعلق بيقول إيه.
لماذا ننجذب للمعلق الرياضي؟
ده كله بسبب الحالة والروح اللي بيوصلوها المعلق الرياضي بصوته بس، نبرة بتطلع وبتنزل وبتحزن وبتفرح لحد ما الصوت بيبقى مبحوح من كتر الانفعال على الجون اللي راح أو ضربة ماكنتش في محلها.
تفاعل وسخونة غير طبيعية تخليك أنت لو ملكش في الكورة تتحمس وتتعصب وتنفعل وتزعل على ضربة الجزاء اللي ماتحسبتش، صوت وأداء يخلي مستوى الإدرنالين يعلى ويخبط في السقف، نقلات غريبة بين كل دقيقة والتانية بيعيشك فيها.
محمود بكر
مش كل المعلقين الرياضيين عندهم نفس السحر، لكن في معلقين خاصين بيميزهم أسلوبهم المميز. زي محمود بكر، اللي جملته الشهيرة “لو بتشرب سيجارة وكوباية شاي في البلكونة، بقولك أدخل، الأهلي جاب جول”، كانت دايمًا بتخليك مش قادر تبعد عن المباراة، وكل جملة ليه كانت أحلى من اللي قبلها.
مدحت شلبي
كمان في مدحت شلبي، جنرال التعليق، اللي دايمًا بيطلع جمل عفوية وكوميدية زي “بيبو وبشير.. بيبو والجون” في قمة الأهلي والزمالك سنة 2002، و”أنا إيه اللي جابني هنا”، و”يانهااار أبيض”، و”هالله هالله”.
حماده إمام
ولا ننسى أيضا حماده إمام اللي كانت جملته الشهيرة “وهوباااااا.. جوا الجول.. هاتها من الشبكة”، دايمًا بتحس إن كل كلمة بيقولها فيها حيوية وحماس بتخليك متشوق للمزيد.
علي زيوار
كان صاحب أشهر إفيهات في تاريخ الكرة المصرية، علي زيوار ، وكان من أبرزها “أنا مش متكيف من الماتش ده”، “إيه الحلاوة دي”، “يا ولد يا ولد يا ولد”.
عصام الشوالي
أما المعلق التونسي عصام الشوالي، فصوته كان دايمًا بيحمل الحماس، خصوصًا مع جمل زي “يا تريكة يا ميسي” و”مش ممكن.. مش ممكن”، اللي كانت تخلينا نحس بقيمة اللحظة.
أيمن الكاشف
وفيه كمان المعلق الرياضي أيمن الكاشف اللي اشتهر بجملته “يا عيني يا عيني على القطايف واللطايف والحلويات”، و”رمضان أبو التفانين حدوتة مصرية”، اللي كانت بتضيف نكهة خاصة لكل ماتش وبتخلي التعليق أكتر متعة.
التعليق الرياضي: ثقافة قيمة
التعليق الرياضي مش مجرد كلام عشان يملا 90 دقيقة في الماتش، ده في أوقات بيبقى ثقافة ومعلومات قيمة بحد ذاتها. المعلقين الرياضيين بيساهموا بشكل كبير في إضافة هيبة للعبة وفي خلق جو من البهجة والتشويق خلال المباراة، بحيث بيخلوها مش مجرد لعبة، بل تجربة ممتعة ومليانة تفاصيل.
آخر كلمة: ماتفوتوش قراءة: حسام غالي: الكابيتانو المشاغب الذي يستطيع التحكم في إيقاع الملعب