أسئلة عن إيلون ماسك وحرية التعبير على الإنترنت

من أول ما أعلنت تويتر عن صفقة بيعها للملياردير إيلون ماسك بقيمة ٤٤ مليار دولار والكلام والجدل مش بيقف، الكلام كله عن حرية التعبير والأخلاقيات على تويتر وإيه اللي بيتقال وإيه اللي هيتمنع، مع هجوم على ماسك وتغريداته الحالية والسابقة من المستخدمين العرب والأجانب.

عن: waya

تخفيف القيود على المحتوي واللي بنكتبه صح ولا لأ؟

على الرغم من تعهده بضمان حرية التعبير على توتير، ظهرت مخاوف حقوقية بعد ما أعلن ماسك عن نيته في تخفيف القيود اللي عاملاها الشركة على المحتوى، وده إن كان شكله الظاهري جميل إلا إن ده برضه هيفتح الباب لزيادة التنمر وانتشار الأخبار الكاذبة، وهي المشاكل اللي ممكن نقول إنها الأمراض الرئيسية لمواقع التواصل الاجتماعي.

مش الجماعات الحقوقية بس، ده الاتحاد الأوروبي نبه ماسك بواجبه في حماية المستخدمين على تويتر وقال تيري بروتون، المفوض الأوروبي للسوق الداخلية، إن أي مؤسسة بتشتغل جوا الاتحاد سواء شركة عربيات أو موقع للتواصل الاجتماعي ملزمة باحترام القوانين. كمان شدد المتحدث باسم رئيس الوزراء البريطاني بوريس جونسون على المسئولية اللي على المواقع دي بغض النظر عن المالك.

المتحدثة باسم البيت الأبيض، جينيفر بساكي، قالت إن الرئيس جو بايدن “عبر منذ فترة طويلة عن قلقه من سلطة مواقع التواصل الاجتماعي العملاقة، زي تويتر وغيره، في نشر المعلومات الخاطئة”. 

عن: theverge

ليه حماية المستخدمين مهمة؟

الاتحاد الأوروبي قال إنه هيعمل قواعد جديدة علشان ينظم السوق الرقمية، اللي من ضمنها شركات التكنولوجيا الكبيرة، واللي هتخلي الشركات دي تشتغل بشفافية أكبر وتقول ليه اقترحت نوع معين من المحتوى للمستخدمين وليه بتتوجه لهم إعلانات معينة، وهنا بتظهر أهمية حماية المستخدم والمواطن في الاتحاد الأوروبي واحترام خصوصيته وحماية بياناته.

ليه في ناس بتكره ماسك؟ وليه ممكن يسيبوا تويتر بسببه؟

ماسك قال إنه بيتمنى من منتقديه إنهم يفضلوا على الموقع لإن ده هو معنى حرية التعبير، ده في الوقت اللي مستخدمين كتير طرحوا أسئلة عن احتمالية استمرارهم على تويتر، خصوصًا إن اليمين المتطرف بدأ يرجع للمنصة في بعض الدول على أساس رفع القيود عن اللي بيكتبوه.

السوابق اللي اتهاجم بسببها ماسك كانت كتير، منها علاقة الود بينه وبين عائلة ترامب، ده بالإضافة لعمالة الأطفال في مصانع تسلا بالكونجو في ظروف غير آدمية، وشغل العمال في ظروف غير آدمية، ورفضه لضريبة المليارديرات.

ليه اشترى تويتر؟

كواحد اتعود على النجاح طول الوقت وإنه يبقى في الصدارة، نقدر نعتبر حب ماسك لتويتر واستحواذه عليه هي قصة حب من طرف واحد، عنده أكتر من ٨٣ مليون متابع وبيكتب تغريدات كتير وبعضها كارثي. سبب تاني مهم جدًا هو إن البورصة الأمريكية منعته من كتابة تغريدات عن تسلا، وده بعد تغريدة واحدة اتسببت في خساير للبورصة وصلت ل١٤ مليار دولار. ماسك قال إنه بعد الصفقة يحب يشوف تويتر بتحقق “إمكانياتها غير العادية” وإنه مش مهتم بالأرباح.

تفاعل العرب

يمكن من القضايا القليلة اللي العرب في تويتر وآراءهم توافقت مع غيرهم هي قضية سيطرة ماسك على تويتر، وده الاتجاه الغالب عمومًا. والتنديد من العرب كان الخوف من اليمين المتطرف والآراء حول اللاجئين، وبرضه كان الخوف من مواقفه الشخصية من العمالة وظروفها غير الآدمية في مصانعه اللي في الصين، وفي ناس راحت أبعد من كده واتكلمت عن رفضه للضرائب على الأغنياء ووجود مليارديرات بيتحكموا في الناس تقول إيه وماتقولش إيه.

أخر كلمة: ماتفوتوش قراءة: قصف جبهة متبادل بين الوليد بن طلال وإيلون ماسك بسبب تويتر

تعليقات
Loading...
Tweet
Share
Share
Pin