في قلب صحرا سيوة وعلى بعد أكتر من 800 كيلو متر للقاهرة في أشد صحاري العالم عزلة، هتلاقي فندق من غير لا كهربا ولا موبايلات ولا أي وسيلة من وسائل التكنولوجيا، والنور فيه على أضواء الشموع والفوانيس .. إيه حكاية الفندق ده؟
أدرير أميلال واحد من أغرب الفنادق اللي ممكن تقضي فيها أجازتك، بس هيكون اختيار مميز ليك لو عايز تنعزل عن العالم بدوشته وزحمته ومشاكله، لإنه هيعيشك تجربة مختلفة من الراحة والاستجمام وهيرجعك لعصور قديمة كانت بتعتمد في حياتها وعيشتها بس على الطبيعة وأي حاجة جاية منها.
فهتلاقي مثلًا الأوض اللي موجودة في الفندق مبنية بشكل مختلف، الأبواب والشبابيك من خشب شجر الزيتون، والأسقف من شجر النخيل، وكل الحيطان والجدران بتاعته اتبنت من الرملة والتربة السيوية أو زيّ ما بيقولوا عليها “الكيراشف” والمادة دي تعتبر عازلة للحرارة زيّها زيّ الطوب اللبن، وده اللي بيمنع الحرارة إنها توصل لأي أوضة في الفندق وفي نفس الوقت بتعكس دفا على المكان بالليل، يعني نقدر نعتبرها مكان بارد في قلب الصحرا. ده غير إن الفندق حوليه سبع بحيرات وبيلف حوليهم شجر الزيتون.
أما عن الأكل، فالاعتماد الأساسي بيبقى على الطبيعة، فتلاقيهم مثلًا بيستخدموا الفاكهة والخضار اللي مزروعين حولين الفندق، والطريقة اللي بيتعمل بيها الأكل برضه تقليدية ومفيهاش أدوات الطبخ الجديدة.
المكان من كتر سحره وتميزه، جذب انتباه صحف عالمية منهم “ديلي اليريطانية” واللي قررت إنها تعمل بحث مفصل عنه وبعتت ناس علشان تستكشف المكان ده، خصوصًا بعد زيارة ولي عهد بريطانيا أمير ويلز وزوجته كاميليا، وده اللي خلاها تسأل “إيه اللي خلى أمير بريطانيا يروح مكان في مصر معزول وفي الصحرا؟ إيه اللي جذبه فيه؟”
بس اللي اكتشفته “الديلي” بعد كده إنه من أجمل المنتجعات الصحراوية اللي ممكن تشوفها في العالم، وأمير بريطانيا ماكانش أول واحد يزور المكان أو يجذب انتباهه، لأ ده في كمان ملكة بلجيكا باولا دي، والمطرب العالمي أشر والمطربة كاتي بيري.
الزوار علشان مايزهقوش لإن طبعًا مفيش أي وسيلة تسلية، فالفندق بيعمل لهم أنشطة مختلفة في اليوم شبه طبيعة المكان زيّ ركوب الخيل.
أدرير ميلال فندق هيعيشك تجربة مختلفة من العزلة هترجعك تاني للطبيعة والفطرة.