أبليكيشن نية: تطبيق مصري جديد هيساعدك على عمل الخير

كتير مننا بيكون حابب يتطوع بمجهوده ويساعد في عمل الخير بس مش عارف يبدأ منين، وإزاي يوصل للناس اللي محتاجين مساهمته. وعلشان كده أطلقت “نية” -مؤسسة المُجتمع المدني اللي بتهدف لتحسين وتنمية المجتمعات النامية، وتغيير النظرة التقليدية للعمل الخيري والتطوعي- أول أبليكيشن في مصر للمساعدة في عمل الخير.

أبليكشن نيه بيقدر يوصلنا بكل المؤسسات الخيرية والحالات المحتاجة مساعدة بكافة أنواعها في مصر من صحة، وتعليم، وذوي احتياجات خاصة، وغيرها، وكمان بيدي الفرصة لمستخدميه إنهم يطلقوا حملات للتبرع ويشاركوها مع أصدقاءهم، والمؤسسة هتساعد في توصيلها للي محتاجينها. وكل ده بالإضافة للدعم اللي بيقدمه الأبليكيشن للمنتجات اليدوية والخيرية عن طريق عرضها للبيع عليه بأسهل الطرق الممكنة.

الأبليكيشن مُتاح على كل أجهزة الأندرويد والـ IOS باللغتين العربية والإنجليزية، وهو بيهدف إنه يخلي تجربة كل المشتركين فيه شخصية عن طريق البروفايل الخاص بيهم اللي هيكون متسجل عليه كل الأنشطة اللي بيقوموا بيها وتبرعاتهم، وفي المقابل هيكون في مكافئات للمستخدمين في شكل نقاط على كل عمل خيري بيقوموا بيه، ويقدروا يستفيدوا من النقاط دي كخصومات في مجموعة من المطاعم المصرية.

آخر كلمة: عمل الخير مش لازم يكون بالمبالغ المالية أو الأنشطة التطوعية الكبيرة، أبسط المُساهمات ممكن تساعد في تغيير حياة إنسان للأفضل.

تعليقات
Loading...
Tweet
Share
Share
Pin