تبادل الهدايا أو الـ “secret santa” جزء أساسي لا يتجزأ من جو الكريسماس اللي كلنا بنستناه كل سنة، وبنفضل متحمسين لحد ما نوصل لمرحلة إن إحنا نيجي نشتري الهدايا فعلًا.. هنا دماغنا بتعطل وبيبدأ التوتر يزيد.. الوقت بيقرب وإحنا لسه مش عارفين هنجيب إيه! لو انت من الناس دي وقادر تحس بالمعاناة، فنحب نطمنك إنك مش لوحدك، وإن الموضوع مش صعب زيّ ما انت فاكر.. كمل المقالة وهتفهم قصدنا.. بس قبل الدخول في أي تفاصيل أو أفكار، خلينا نتفق إن قيمة الهدية مش في سعرها ولا بماركتها، فممكن تكون الهدية بسيطة، ولكن لإنها مُختارة بحب، بتكون قيمتها أغلى من أي حاجة… الموضوع فعلًا مش بالفلوس، لكن بكون الهدية لايقة مع شخصية صاحبها، أو بترمز لحاجة بالنسبة ليه، زيّ ما قالت شيري عادل في فيلم بلبل حيران، في حاجة اسمها “فن.. اختيار.. الهدايا”.
شرابات الكريسماس
بديهي صح؟ شرابات الكريسماس.. في الكريسماس؟ كل الناس ممكن يكونوا بيجيبوا الهدية دي، ولكن الفكرة بتختلف في تنقية الشكل اللي هتشتريه.. صاحبك أو زميلك اللي هتشتريلوا بيحب ألوان إيه.. وبيحب السانتا ولا الغزلان ولا شجرة الكريسماس؟ اختيار شكل الشراب هيبقى مؤشر واضح في قد إيه انت تعرف الشخص اللي قدامك، ونأكدلك إنه هيفرح لإنك منقتش أي حاجة وخلاص، ولكن جيبت شكل معين مخصوص لإنك عارف إنه بيحبه.
صندوق السعادة
وهي السعادة إيه غير صندوق مليان حلويات؟ بس خلي بالك، مكونات الصندوق ده هتختلف من حد للتاني.. يعني مثلًا لو هتجيب ده لصاحبك وبيحب الطبيخ، يبقى مفيش مانع تجيبله شوية مكونات لأكل المطبخ واللي يكون ليه علاقة بالكريسماس، زيّ مثلًا powder مشروب الشوكولاتة السخن، مارشميلو أو مكونات الكوكيز.. ويكمل الصندوق ده بسانتا صغير كده يدي شكل وروح للهدية المتكاملة!
برطمان جواه رسائل إيجابية
مفيش أجمل من إن حد قريب منك يكتبلك شوية جمل إيجابية مكتوبة بخط الإيد مخصوص علشانك انت كاتب ذكرياتكم سوا، أو انت شخص مهم في حياته أو حتى اقتباسات إيجابية تديلك الأمل وقت الأزمات.
ألبوم صور
لو الشخص اللي طلعلك في السيكرت سانتا قريب منك، يبقى دي الهدية المثالية حرفيًا.. جمع بعض الصور المميزة ليكم، وإعملهم بطريقة مختلفة، وممكن معاهم تكتب شوية رسائل للشخص تقولوا ليه انت ممتن لوجوده في حياتك، هتكون هدية بمليون جنيه!
صندوق كريمات ومعطرات
في بعض المحلات بتبقى مجهزة مجموعة من المنتجات مع بعض زيّ سوائل الصابون وعينات من المعطر، وبالرغم من إنها بتكون بسيطة إلا إنها بتبقى مفيدة جدًا في الاستعمال وشكلها مبهج كمان، خصوصًا بالنسبة للسيدات.
شموع معطرة
مثبت علميًا إن الروائح الجميلة بتجيب شعور بالسعادة، وإحنا إيه اللي عايزينه غير إن إحنا نبسط الناس اللي بنحبهم؟ فممكن تجيب شمعة شكلها حلو وريحتها مميزة (يكون الشخص بيحبها)، وممكن معاها تجيب كريمات ليها النفس الرائحة علشان تبقى “set” متكاملة.