فاكرين كشف فك اللفائف عن وجه مومياء الملك أمنحتب الأول بالأشعة المقطعية؟ اللغز اللي حير العالم كله بعد ما فضلت ملفوفة بالكتان لمدة ماتقلش عن 3 آلاف سنة، والمومياء الوحيدة اللي ماكانش اتفك الرباط عنها في العصر الحديث.
في الساعات اللي فاتت، الكشف ده أخد المركز الأول في قائمة أفضل 10 اكتشافات أثرية في العالم لسنة 2022 لمجلة الآثار التابعة لمعهد الآثار الأمريكية، ومش بس كده، ده كمان الكشف الأثري لوجه أمنحتب كان بطل غلاف مجلة الآثار الأمريكية.
في شهر مايو سنة 2019، كانت الدكتورة سحر سليم، أستاذ ورئيس قسم الأشعة في كلية الطب وخبيرة أشعة الآثار، على موعد مع اكتشاف سر من أسرار الحضارة المصرية القديمة، لما بدأت إجراء الأشعة المقطعية على مومياء أمنحتب الأول، علشان تبقى أول من شاهد وجه الملك المصري أعظم ملوك مصر القديمة بعد إعادة دفنه قبل حوالي 3000 سنة، وبعد ما كان ملفوف بالكتان ومغطى من الرأس للقدمين بأكاليل من الأزهار، والرأس بالتحديد مغطى بقناع مصنوع من الخشب المطلي.
أسرار أعظم ملوك مصر القديمة
بتقول الدكتورة سحر سليم في كشفها عن أسرار المومياء بعد إجراء الأشعة المقطعية، إن الحالة الصحية للملك كانت جيدة، وإن عمره وقت الوفاة يقدر بحوالي 35 سنة وده استُدل عليه من موضع التقاء عظمتين الحوض، بجانب إن طول أمنحتب الأول كان حوالي 169 سم، ومختون، وله أسنان في حالة جيدة، وبيحيط بالمومياء حزام مكون من 34 خرزة ذهبية.
وبالنسبة لأسباب الوفاة، فالأشعة المقطعية ماقدرتش تكتشفها، يعني ماظهرش أي إصابات أو أمراض تصيب العظام ولا علامات تصلب شرايين تقول إن الوفاة كانت غير طبيعية، زيّ ما ظهر في مومياوات تانية، ومن المرجح إن سبب الوفاة يكون عدوى أو إصابة في أي عضو أُزيل وقت التحنيط.
بجانب إنها كشفت الشبه الكبير بين أمنحتب الأول ووالده الملك أحمس؛ وده لما ظهر وجه المومياء بملامح ذقن ضيقة وأنف صغير ضيق وشعر مجعد وأسنان علوية بارزة.
بعد الكشف، اتأكد إن حالة المومياء أخدت عناية فائقة بعد ما كهنة الأسرة الـ 21 أعادوا دفنها في مخبأ الدير البحري الملكي، واتعالج أكتر من قطعة للمومياء اتعرضت للتلف بسبب عبث نابشين القبور الملكية، والتصرف ده بيشير للبعد الحضاري الراقي للكهنة.
أمنحتب الأول اتولى عرش مصر بعد والده، وحكم البلاد لمدة 21 سنة، من 1525 لـ 1504 قبل الميلاد في الأسرة الـ ١٨، وكانت مومياء الملك المومياء الملكية الوحيدة اللي ماتفكش الرباط عنها في العصر الحديث، وده للحفاظ على جمال المومياء المغطاة بالقناع الجنائزي وبأكاليل الزهور الملونة.
دي ماكانتش المرة الأولى اللي تُجرى فيها فحوصات على الملك، سبق واتعمل قبل كده ولكن باستخدام الأشعة السينية، بس ماكانش بمقدورها تقدم معلومات وتفاصيل دقيقة عن المومياء زيّ الأشعة المقطعية، لإن المعلومات ثلاثية الأبعاد بتظهر ثنائية الأبعاد في الأشعة السينية.
وبالنسبة لقائمة أفضل 10 اكتشافات أثرية في العالم، فضمت كمان؛ قرابين حضارة الآزتك في المكسيك، وتمثال عمره 30 ألف سنة بيمثل ميلاد فينوس من النمسا، وأقدم رزنامة من حضارة المايا في أمريكا الجنوبية عمرها أكتر من 200 سنة، ومقابر الحرفيين الأثرية في بيرو من 1500 سنة، وأقدم معبد بوذي من القرن السادس في باكستان.