الدنيا ربيع والجو بديع، وشم النسيم على الأبواب، اللي بيحتفل به المصريين كلهم من جميع الطوائف، وبنلون بيض، وناكل رنجة وفسيخ، ونخرج ونتفسح، ورغم احتفالنا بشم النسيم السنة دي في شهر رمضان الكريم، إلا إن ده مش هيوقفنا إننا نمبسط فيه، فكلنا متحمسين، وخصوصًا بعد ما اتمنعنا منه السنة اللي فاتت في موجة الكورونا والعزل، وعلشان كده، جبنالكم أماكن ممكن تسافرها لمدة يوم واحد تحتفل فيهم بشم النسيم وتقضي وقت ممتع.
قرية تونس
قرية تونس في الفيوم، أقل من ساعة بالعربية من القاهرة، من أكتر الأماكن المريحة نفسياً وماتزهقش منها مهما روحتها، ويمكن اشتهرت القرية أكتر السنة دي بعد ما ظهرت في مسلسل “لعبة نيوتن” من خلال بيت سيد رجب اللي في القرية اللي قايم بشخصية “بدر بيه”، والبيت مبني على الطراز الإسلامي، في القرية تقدر تعمل أنشطة كتيرة زيّ ركوب الخيل والأكل البدوي وتساعد في عمل المنتجات اليدوية، هي فيها الطابع الريفي عمومًا اللي هيحسسك بجو شم النسيم. وتقدر تروح هناك وادي الريان.
اسكندرية
اسكندرية من أكتر الأماكن اللي تقدر تسافرها وترجعها في نفس اليوم، وتقدر تعمل فيها أنشطة وحاجات كتيرة خلال اليوم ومش مكلفة بشكل كبير، منها كوبري ستانلي ومجموعة من المنتزهات زيّ قصر المنتزه، وشواطيء كتير من المجاني للخدمة السياحية، بالإضافة إنك هتلاقي مجموعة متميزة من مطاعم السمك في المنشية وأبو قير لو مش بتحب الرنجة والفسيخ.
بورسعيد
بورسعيد عكس المتوقع لناس كتير إن مفيهاش أماكن تتخرج فيها، بالعكس فيها مناظر حلوة كتير ممكن تستمتع بيها زيّ كورنيش بورسعيد والممشى فيه أماكن كتيرة تقدر تقعد فيها وتشوف المجرى الملاحي لقناة السويس والسفن الموجودة، ده غير فنار بورسعيد أقدم منارة خرسانية، ولو عايز جنينة هتلاقي حديقة المنتزه في حيّ بور فؤاد، غير محلات التجارية تقدر من خلالها تشتري اللي انت عايزه.
العين السخنة
آخر مكان معانا لو حابب تقضي اليوم ده في استجمام وهدوء بعيدًا عن زحمة العاصمة، تقدر تحجز ليلة واحدة في فندق وتقضيها هناك وتركب يخت وتستمتع بأكل السمك.