اختراعات مش بتنتهي للكنافة، اللي تعتبر الراعي الرسمي للتحلية في رمضان، بعد ما فضلت سنين محتفظة بوقارها ومالهاش غير طريقة ولا اتنين، الحكاية ابتدت بالكنافة بالمانجا، وبعدين النوتيلا، وبعد كده ماحدش عرف يوقف التطور ده، وبوصفات ماتجيش على بال حد، لدرجة إنها بقيت تتعمل حادقة، الكنافة خلاص بقى ليها ألف شكل، من كل دول اختارنا 10 طرق سهلة ولذيذة هنقولكم تعملوهم إزاي علشان تنوعوا في الكنافة في رمضان.
كنافة بالمانجا
دي اللي فتحت الطريق لكل الوصفات المختلفة للكنافة، بطريقة سهلة، هتجيب نص كيلو كنافة، كوباية سكر، نص كوباية سمنة، كيلو مانجا متقطعة مكعبات، ونص لتر عصير مانجا، وتلات كوبايات كريمة، هتخلط الكنافة بالسمنة والسكر، لحد ما تبقى ملمسها ناعم ومتفتفتة، افردها في صينية، واضغط عليها وبعدين دخلها الفرن لمدة ربع ساعة، وحط عليها عصير المانجا، بعد كده حط الكريمة، وحط عليهم قطع المانجا، كرر الخطوات دي علشان يبقى عندك طبقات.
كنافة لوتس
ودي من أحدث صيحات الكنافة، هتجيب ربع كيلو كنافة، كوبايتين زبدة لوتس، نص كوباية زبدة، ونص كوباية بسكوت لوتس مفتت، وهتحط الكنافة في صينية، وتضيف الزبدة بعد ما تكون سيحتها، وتخلطهم مع بعض كويس وتدخلهم الفرن ربع ساعة لحد ما لونها يبقى دهبي، وهتدوب زبدة اللوتس في المايكروويف لحد ما تسيح شوية، وبعد كده تحط زبدة اللوتس فوق الكنافة، وترش بسكوت اللوتس المطحون على الوش، وعلى حسب ما تحب ممكن تزود شوكولاتة سايحة على الوش، أو صوص كراميل.
كنافة بالكاستر
دي الجندي المجهول من زمان، وطريقتها سهلة، هتجيب نص كيلو كنافة، وكوباية سمنة، وكوبايتين كاستر، وكوباية شربات، وهتخلط الكنافة بالسمنة وتفتفتها، وهتجيب صينية تدهنها شوية سمنة، وتحط فيها نص كمية الكنافة، وتضغط عليها، وتفرد طبقة الكاستر فوقها، وتحط باقي كمية الكنافة لحد ما تغطي بيها طبقة الكاستر، وتحط معلقة سمنة على الوش علشان تبقى لونها دهبي، وتدخلها الفرن لمدة 40 دقيقة، وبعد ما تخرج من الفرن صب عليها الشربات وهي سخنة.
كنافة بالجبنة الكيري ودبس الرمان
من اسمها كده غريبة صح؟ بس لو جربتها هتعجبك، طريقة مختلفة عن اللي متعودين عليها، المقادير تبان كتير ودوشة بس سهلة، هنجيب نص كيلو كنافة، وربع كوباية زبدة سايحة، و 3 مكعبات جبنة كيري، وربع كوباية كريمة لباني، وكوبايتين سكر، ونص كوباية حب رمان، و5 معالق دبس رمان، ومعلقة صغيرة مستكة، في الأول هنقسم كمية الكنافة نصين، ونفتفتها، النص الأول ضيف عليه كوباية سكر وكمية الزبدة، هنحطها في صينية مدهونة بشوية زيت، ونقلبها بإيدينا كويس ونضغط عليها علشان تتماسك، ونعيد نفس الخطوات مع الكمية الباقية من الكنافة بنفس الطريقة، وندخل الصينيتين للفرن، لحد ما وشها يحمر، بعد كده هنحضر الكريمة ، نضربها مع الجبنة الكيري كويس، ونضيف لهم كوباية سكر، ومعلقة المستكة ونقلب المكونات كلها لحد ما تكون متجانسة، هنحط المزيج ده على سطح جزء واحد من الكنافة، ونغطيها بالجزء التاني من الكنافة، وهندخل الصينية تاني للفرن لمدة 3 دقايق لحد ما الجبنة تسيح، بالنسبة للشربات، هنحضره بالطريقة العادية ونضيف له دبس الرمان، ونسقي الكنافة بيه.
كنافة نوتيلا
متربعة على عرش الاختراعات الجديدة، هتجيب كيلو كنافة ونص كوباية زبدة أو سمنة، وعلبة نوتيلا ومعلقة صغيرة سكر، ونص معلقة ملح، ومكسرات، في الأول هتفتفت الكنافة لحتت صغيرة، وتخلطها بالسمنة أو الزبدة لحد ما يدوبوا، وضيف عليهم الملح والسكر، وحضر صينية حط فيها الكنافة ودخلها الفرن حوالي 20 دقيقة أو لحد ما تحمر، وبعد كده حط عليها النوتيلا بشكل مسطح، ودخلها الفرن مرة تانية لمدة دقايق بسيطة علشان الشوكولاتة تسيح وتتشرب في الكنافة أكتر، وممكن تحط على الوش قطع موز أو فراولة أو مكسرات لو تحب.
كنافة بالقشطة
العادية اللي متعودين عليها، وهنفضل نلف نلف وهي دي الأساس، وطريقتها سهلة، هتجيب نص كيلو كنافة، وكوباية سمنة سايحة، ونص كوباية سكر بودرة، وللحشو هنحضر كوبايتين لبن و3 معالق كبار نشا، ومعلقتين بودرة كريم شانتيه، وكوباية قشطة بلدي ومعلقة صغيرة فانيليا. زيّ كل مرة هنخلط الكنافة بالسمنة وندوبهم مع بعض، ونفرد نص الكمية منها في صينية مدهونة بسمنة، وهنحط طبقة القشطة اللي تحضيرها هيكون بسيط، هناخد اللبن وندوب فيه النشا والفانيليا وبودرة الكريم شانتيه ونقلبهم على النار لحد ما يتقلوا، ولما القوام يتماسك هنرفعه من على النار ونضيف عليه القشطة البلدي ونقلب وبعدين نسيبهم يهدوا، ونحطه على الكنافة، وبعد كده نضيف باقي كمية الكنافة وندخلها الفرن لحد ما تحمر، ولما تخرج نسقيها بالشربات.
كنافة نابلسية
هتجيب ربع كيلو كنافة، ونص كوباية زبدة سايحة، وربع كيلو جبنة موتزاريلا، وفستق، في البداية هنخلط الكنافة بالزبدة وندوبهم، وندهن صينية بالزبدة ونحط فيها الكنافة ونكبسها بالمعلقة، كويس، ونحط الجبنة وندخل الصينية الفرن لمدة ربع ساعة لحد ما الأطراف تحمر، ولما تخرج من الفرن هنقلبها في طبق التقديم وبعد كده نسقيها بالشربات ونحط الفستق على الوش.
كنافة بالموز
طريقتها ومكوناتها سهلة وطعمها مختلف، هنجيب كيلو كنافة، ونص كيلو قشطة، و3 كوبايات سكر، و قطع موز، وكوباية سمنة، ومكسرات للتزيين. في البداية هنجيب صينية ندهنها سمنة، ونحط نص كمية الكنافة فيها، ونحط طبقة سمنة، وطبقة قشطة فوقهم، وقطع من الموز، وبعدين نحط الكمية الباقية من الكنافة فوق طبقة الموز، ونحط شوية سمنة على الوش، وندخلها الفرن لمدة نص ساعة، ونسقيها بالشربات ونزينها بشرايح الموز والمكسرات.
كنافة cups
علشان تبقى سهلة وخفيفة في الأكل، هنجيب نص كيلو كنافة، وكوباية سمنة، سكر بودرة، مكسرات، جبنة ريكوتا، شربات. هتفتت الكنافة مع السكر البودرة والسمنة وبعدها تحطها في قوالب الكب كيك وتدخل الفرن، وتسقيها بالشربات لما تخرج وتضيف لها الجبنة الريكوتا و المكسرات.
كاسات كنافة وقمر الدين
بطريقة بسيطة، هنجيب الكنافة المفتتة فى السمنة نصفيها ونضيف الشربات، ونحط فى الكاسات طبقة من الكنافة وبعدين طبقة من عصير قمر الدين وبعدين طبقة من الكريم شانتيه ونقدمها.