هنا جودة لاعبة النادي الأهلي ومنتخب مصر لتنس الطاولة، والمصنفة رقم واحد عالميًا في اللعبة دي تحت سن 15 سنة، والمركز التالت عالميًا تحت 17 سنة، النهارده حققت إنجاز جديد بتتويجها بذهبية العالم لتنس الطاولة.
البطولة كانت مقامة في البرتغال، في الفترة من 2 لـ8 ديسمبر، وصعدت هنا لنصف النهائي بعد فوزها على الألمانية جارسيل ميا بنتيجة 4-1. واليابانية ميورا هاريمونوتو تم تتويجها بنفس اللقب بعد الفوز على ثنائي ألمانيا 3-0. ومن المفترض إنها تستنى الفائزة من بين اليابانية والسنغافورية لن كيان اللي هيلعبوا وجهًا لوجه في الماتش التاني للدور القبل نهائي.
ليه سموا هنا جودة بالطفلة المعجزة؟
بسبب الإنجازات الكبيرة اللي عملتها في سن صغير، وسبقت ناس ممكن يكونوا أكبر منها في العمر، هنا جودة اعتبرتها كل الصحف أمل مصر في تنس الطاولة باعتبارها أصغر لاعبة فيها. هنا بدأت مسيرتها الرياضية وهي عندها أربع سنين، بدأت برياضة الجمباز لمدة صغيرة قبل ما تروح لرياضة السباحة وكرة اليد وفضلت تتمرن فيهم لمدة سنة لحد ما استقرت على رياضة تنس الطاولة.
هنا تعتبر أول لاعبة مصرية وعربية تتصدر التصنيف العالمي تحت سن 15 سنة، وفي الجزائر فازت ببطولة الجزائر الدولية سنة 2016 وكان عندها في الوقت ده 8 سنين! وأخدت البطولة التونسية في 2018، كسبت قبل كده الميدالية الذهبية في بطولة سلوفينيا الدولية للناشئين وخدت المركز الأول فيها، وفي نفس السنة فازت ببطولة أفريقيا، وفي 2017 جابت الميدالية الفضية في البطولة السويدية.