شايفين أخبار عن حديث كراهية ضد أهل مصر في الصعيد، وأخبار عن تحقيقات ووقف إعلامي وسحب ترخيص مزاولة المهنة، واشتعلت الأخبار عن وقف المذيع تامر أمين بعد حديثه بلهجة فيها غلط في أهل الصعيد وكان الرد عليه من الجمهور شديد جدًا، واعتذرت القناة الفضائية اللي تم بث البرنامج من خلالها، وتدخلت نقابة الإعلاميين وعملت تحقيق عاجل انتهى بقرار إلغاء تصريح مزاولة المهنة للمذيع لمخالفته ميثاق الشرف الإعلامي، إيه اللي حصل بالظبط؟
في حلقة من برنامج المذيع تامر أمين، اتكلم فيها عن تنظيم النسل، اللي دلوقتي اتجاه شائع في الدولة كلها وبتحث عليه الهيئات المعنية كلها، لكن تصريحاته على الموضوع ده تضمنت لهجة هجوم وغلط في أهل الصعيد، لإنه قال في كلامه عن الزيادة السكانية في مصر وإن نسبة كبيرة من الأهالي في الريف والصعيد بيخلفوا أطفال علشان يصرفوا عليهم، وإنهم مش بيلحقوهم بالتعليم وبيشغلوهم في ورش علشان يتعلموا حرفة بمجرد إن الطفل يبلغ 6 سنين، وأضاف بلهجة مستنكرة: “لو الأب خلف بنت مش هيغلب، يدخلها المدرسة؟ قطعا لا، في الصعيد بيشحنوا البنات على القاهرة عشان يشغلوهم خادمات”.
ومن ساعتها حصل جدل كبير على السوشيال ميديا والناس ردت بـ “الصعيد خط أحمر”، لكن قبل اتخاذ أي قرار رسمي من جهة مختصة، اعتذرت القناة في بيان رسمي وتم حذف المقاطع اللي فيها حديث أثار الجدل، واعتذر تامر في فيديو وقال إن البعض حرّف تصريحاته واجتزها من سياقها.
لكن نقابة الإعلاميين فتحت تحقيق عاجل مع المذيع، وانتهى التحقيق بقرار إلغاء تصريح مزاولة المهنة للإعلامي تامر أمين بسبب تصريحات الغير لائقة عن فتيات الصعيد، وقالت النقابة في بيان: “بعد انتهاء التحقيقات التي استمرت نحو ثلاث ساعات ونصف الساعة قد ثبتت مخالفة تامر أمين لميثاق الشرف الإعلامي ومدونة السلوك المهني” وده بعد قرار هيئة مكتب المجلس الأعلى لتنظيم الإعلام في مصر، بوقف برنامج الإعلامي، تامر أمين، واستدعائه للتحقيق.