في مدينة المنصورة، محافظة الدقهلية، انطلقت جنازة مهيبة في تشييع جثمان البطل المصري يوسف الشريف لاعب منتخب مصر وبطل قارة افريقيا للدراجات ومركز استاد المنصورة. كان مشهد جنائزي ضخم بحضور عدد من كبير من الأهالي والأصدقاء والعيلة، بالإضافة للمسئوليين الرياضيين وزملاءه في اللعبة.
مات الشريف على طريق رافد جمصة-المنصورة، في حادث تصادم الموتوسيكل اللي كان راكبه مع صديقه-لاعب في منتخب مصر للدراجات- بجرار زراعي، وفارق الشريف الحياة في الحال في حين اتلحق صديقه وتم تحويله للعناية المركزة في مستشفى بلقاس المركزي لتلقي العلاج اللازم.
من هو يوسف الشريف بطل افريقيا للدراجات؟
اتكلمنا مع الكابتن أحمد وحيد مدرب يوسف في منتخب مصر للدراجات علشان نعرف أكتر عن حياته، وقالنا إن يوسف شريف ابراهيم السيد، من مواليد مركز المنصورة محافظة الدقهلية، عنده 19 سنة، وكان بيدرس في كلية هندسة البترول والبتروكيماويات في جامعة المنصورة الجديدة .بيقول كابتن وحيد: “اتعرفت على يوسف وعمره 11 سنة لما بدأ يتدرب معايا”، وبيضيف: “كان موهوب جدًا وده كان واضح من أول ما بدأ التدريب، وكان مستواه بيتطور بشكل سريع جدًا”.
وعلشان مستوى يوسف كان بيتطور بشكل سريع جدًا قرر الكابتن وحيد يخليه يلعب في نادي شباب المنشية في المنصورة علشان يكون مع شباب من مستواه، وبسرعة وبعد الموسم التاني له في اللعبة قرر الكابتن إن مستواه اتطور كفاية إنه يلعب في ستاد المنصورة علشان يترشح للعب في منتخب مصر للدراجات.
بيقول كابتن وحيد: “وعنده 14 سنة لعب مع منتخب مصر في بطولة الجمهورية ناشئين، وقدر يحقق المركز التالت رغم سنه الصغير”، وعلشان كان يوسف طموح وهدفه إنه يكون بطل ويشيل اسم مصر ويشرفه، اجتهد لحد ما دخل البطولة العربية للدراجات مع منتخب مصر سنة 2020.
بيقول الكابتن وحيد: “ضموا كابتن محمد ابراهيم، المدير الفني، لمنتخب مصر للتراك في 2020، ودخل (البطولة عربية طريق) في نفس السنة واللي كانت بتتلعب في مصر، ولعب بشكل قوي جدًا وقدر يحقق مركز اول تيم اسبرنت ومركز تاني في سباق الكيلوا”.
في سنة 2021 دخل يوسف الشريف البطولة الأفريقية للدراجات وقدر يحقق فيها مركز تاني في سباق الكيلو ومركز تاني تيم اسبرنت، وبيقول الكابتن وحيد: “كان نفسه يوصل للأولمبيات ويلعب ويحقق ميداليات، كان فاضله حاجات بسيطة جدًا ويتأهل للأولمبيات”.
بيقول كابتن وحيد إن يوسف كان طموح جدًا وطيب ومحبوب من كل الناس اللي حواليه، وإنه كان بيتميز بصفة عطاء بتظهر في حاجات بسيطة زيّ إنه يقف علشان يساعد زمايل محتاج في الطريق، أو يشارك قطع الغيار بتاعته مع اللي حواليه، وبيصفه بإنه شخص طموح كان عنده أحلام كبيرة قدر يحقق منها كتير، وكان فاضل أحلام تانية كتير مالحقش يحققها.
نعى وزير الشباب والرياضة الدكتور أشرف صبحي، وفاة يوسف، واتقدم في بيان رسمي النهارده بالعزاء لأسرته ولأسرة الرياضة المصرية، أما الإتحاد المصري للدراجات برئاسة الدكتور وجيه عزام فاتقدم بالعزاء لأسرة يوسف ومنتخب مصر ونادى مركز شباب المنصورة.