مفيش شك إن معظم الناس بيكون كل تركيزها في رمضان، على المسلسلات اللي بتتعرض على التلفزيون. ولكن ده مايمنعش إن في ناس تانية بتحب المسلسلات الإذاعية سواء علشان بتفكرهم بأيام زمان والمسلسلات الإذاعية القديمة اللي كبروا عليها، أو حتى علشان بتسليهم في الطريق وبتخلي الخيال يشتغل عندهم. وبما إن في السنين الأخيرة ماكنش في مسلسلات إذاعية بكم كبير، فالسنة دي مختلفة لإن في كذا مسلسل إذاعي هيتعرض على قنوات الراديو في موسم رمضان، وكمان من بطولة نجوم كبار! فمن غير ما نطول عليكم، تعالوا نعرف إيه هما المسلسلات دي وهتتعرض على أنهي قنوات..
عشان الـ big million
زيّ ما كانت نيللي وآسر ياسين مكتسحين رمضان اللي فات، الواضح إن ده هيحصل في رمضان السنة دي كمان لإنهم هيقدموا مع بعض برنامج إذاعي على راديو إنرجي! وقصة المسلسل هتكون عن شاب وسيم من عائلة غنية بس بيشترط عمه إنه يتجوز، وبيقابل في طريقه بنت أبعد ما يكون عن تخيله.
نادي أندرويد
انتهى الفنان أحمد عز من تسجيل حلقات مسلسل نادي أندرويد، و بيشاركوا بطولة المسلسل الفنانة نسرين طافش والفنانة القديرة سميحة أيوب، وهيتعرض على محطة نجوم أف إم.
حزام ناشف
مانقدرش نستغنى عن محمد هنيدي وخفة دمه اللي بتضيف روح البهجة في شهر رمضان، علشان كده نحب نقولكم إنه فعلًا هيقدم برنامج إذاعي مع منى عبدالغني، وهيتعرض المسلسل الكوميدي على محطة راديو النيل.
رحلتي من الشك لبلطيم
كلنا بنحب نشوف كابل حقيقي في عمل مع بعض علشان بيدي vibes كده مميزة.. وده بالظبط اللي هنحس بيه لما نشوف هنادي مهنا وزوجها أحمد خالد صالح في عمل إذاعي مع بعض السنة دي في رمضان. العمل بينتمي لفئة الـ fantasy والكوميدي عن زوجين بيحاولوا يوصلوا لملجأ الناجيين اللي عاشوا بعد كارثة كونية في بلطيم.
29 يوم
مسلسل إذاعي هيقوم ببطولته محمد سعد، وهيكون من تأليف مجدي الكدش وإخراج علي مصيلحي، وإنتاج ميديا سيتي، وهيقدر الجمهور يتابعه على إذاعات راديو النيل.
ولاد عائلة شنب
نقدر نقول إن ٢٠٢١ كلها سنة روبي مش موسم رمضان بس، ولكن علشان تكون متواجدة معانا (حرفيًا) في كل أوقات السنة، هتكون معانا كمان في المسلسل الإذاعي ولاد عائلة شنب في رمضان على راديو النيل.
كوكو واوا
هشام ماجد وشيكو ثنائي بيقدر يعمل ضجة من أي عمل بيعملوه لإنهم دايمًا بيلجأوا لتقديم أفكار جديدة ومختلفة، وعلشان كده مش غريب إنهم هيقدموا مسلسل إذاعي في رمضان، اللي هيكون أول عمل 3D في الراديو بتقنية الصوت المجسم والمؤثرات، وطبعًا العمل هيكون كوميدي لإنه هيتكلم عن الفرق بين حياة القطط والكلاب والصراع بينهم. مستغربين من القصة؟ مش أوي!
إحنا بتوع الأزوريس
أكرم حسني هو كمان هيمتعنا في رمضان بمسلسل إحنا بتوع الأزوريس مع آيتن عامر، اللي هيتعرض في موسم رمضان على نجوم إف إم.
غرام واكصدام
بطولة النجمة يسرا اللوزي، والفنان ياسر فرج، وهيتذاع على راديو مصر، من إنتاج هبة الهواري شركة انتروميديا، وبتدور أحداثه في إطار الدراما الاجتماعية والرومانسية.
جمال كازوزة
المسلسل الكوميدي “جمال كازوزة” بطولة أحمد أمين، وهيتعرض على راديو 9090 في رمضان.
دايرة الشك
لأول مرة فرقة واما (أحمد فهمي، أحمد شامي، محمد نور، ونادر حمدي) هيتجمعوا في عمل إذاعي على نجوم إف إم، واللي هيتكلم عن بعض حوادث الجرايم.
اتنين في واحد
إيمي سمير غانم من الفنانات اللي هتقدم برنامج إذاعي في رمضان وهيشاركها دياب في بطولة المسلسل الكوميدي اللي هيتعرض في راديو 9090.
خلي بالك
هيشارك السنة دي في رمضان أحمد آدم في المسلسل الكوميدي خلي بالك وبيشاركه البطولة انتصار وسليمان عيد، وهيتم بث المسلسل على راديو 9090.