أعلن المجلس القومي للأمومة والطفولة إنه أحبط محاولة زواج طفلة عمرها 16 سنة! وده بعد ما منظومة نجدة الطفل تلقت بلاغ من إحدى المواطنات رفضت إنها تقول اسمها وقالت في البلاغ إن والد الطفل عايز يجرها إنها تتجوز قبل بلوغها السن القانوني.
وبناءً على البلاغ اللي اتقدم، أمين عام المجلس وجه بسرعة اتخاذ كل الإجراءات علشان ينقذوا الطفلة من الجريمة دي وتم تحويل البلاغ للجنة واللي قامت بدورها في التأكد من صحة الواقعة، وبعد ما اتأكدوا تم تحرير محضر واستدعاء والد الطفلة واللي دافع عن نفسه وقال “أنا ماكنتش أعرف حاجة عن السن القانوني للجواز!” ومضى على إقرار إنه ممنوع يجوز بنته قبل ما تتم السن القانوني.
زواج القاصرات نقدر نعتبره نوع من أنواع الاغتصاب الزوجي بس بيتم بشكل قانوني، اغتصاب للبراءة وللطفولة وتبعات نفسية وجسدية بتصيب الطفلة مابتنتهيش، في جرائم كتير بترتكب في حق الأطفال زيّ العمالة مثلًا، بس في جرائم بتسرق من العمر والروح والضحية مش بيرجع بعدها زيّ الأول.
زواج القاصرات فاتورة مش بيدفعها غير الضحية، بتزود عمر فوق عمرها وبتكبرها قبل أوانها وبيخليها تتحمل مسئوليات مش بتاعتها أصلًا! الوقت اللي المفروض تبدأ تشوف فيه حياتها، بتدخل جوازة تنهي كل حياتها بالبطيء.