أعلن الاتحاد المصري لكرة القدم، إنه استلم خطاب رسمي من ليفربول، بيعتذر فيه عن منع محمد صلاح من السفر لمصر للانضمام لمنتخب “الفراعنة”. منتخب مصر هيبدأ معسكر خلال أيام علشان يستعد للمباراتين اللي جايين في تصفيات مونديال “قطر 2022” استعدادًا لكأس العالم.
خطاب ليفربول للاتحاد المصري لكرة القدم اتحجج بالإجراءات الاحترازية اللي طبقتها إنجلترا علشان تواجه تفشي فيروس كورونا، واللي بيحط المسافرين اللي راجعين من بعض الدول في عزل صحي إجباري لمدة 10 أيام بعد وصولهم إنجلترا على طول.
اتصل المسئولين في الاتحاد المصري لكرة القدم بمحمد صلاح، وأكد صلاح إنه عايز ينضم لمنتخب مصر في المعسكر اللي جاي، وإنه هيتكلم مع المسئولين في نادي ليفربول والمدير الفني الألماني يورغن كلوب، علشان يحاول ينهي الأزمة.
وضح خطاب ليفربول الرسمي عن مخاوفه من إن فترة العزل الصحي اللي هيدخل فيها صلاح بعد رجوعه من مصر ممكن تؤثر على لياقته البدنية، وكمان وضحوا إنهم خايفين من حقيقة إنهم مش عارفين ممكن السلطات الإنجليزية تحط صلاح فين علشان يعدي فترة الحجر الصحي بعد رجوعه من مصر.
بدائل محمد صلاح لو منعه ليفربول من الانضمام لمنتخب مصر
في مصادر بتقول إن أحمد سيد زيزو لاعب الزمالك وحسين الشحات لاعب الأهلي ومصطفى فتحي لاعب سموحة، هم بدائل محمد صلاح، في مركز الجناح اليمين في مباراة أنغولا.
منتخب مصر هيواجه المنتخب الأنغولي، يوم واحد سبتمبر في القاهرة، قبل السفر لمدينة فرانسفيل علشان يواجه منتخب الغابون، يوم 5 سبتمبر 2021، وده ضمن منافسات الجولتين الأولى والتانية من تصفيات القارة الأفريقية اللي هتتأهل لمونديال “قطر 2022”.
ميدو بيهاجم صلاح: كان لازم يعمل زيّ ميسي
قال ميدو في تصريحات على قناة النهار المصرية: “ليفربول رفض مشاركة محمد صلاح مع منتخب مصر في مباراة الغابون، مع إن الغابون مش في المنطقة الحمراء”.
وتابع: “صلاح مش بيتواصل مع أي مسئول من اتحاد الكرة، والوحيد اللي بيرد هو وكيله رامي عباس”.
وكمل: “محمد صلاح وكل اللاعبين الأفارقة، لازم يضغطوا على أنديتهم علشان يسمحوا لهم يلعبوا مع منتخباتهم”.
ووضح: “أنا مش بهاجم محمد صلاح.. ولكن فين دوره في الضغط على النادي بتاعه علشان ينضموا للمنتخب؟ أتمنى من اللاعبين يكون لهم دور، بدل ما يصدروا وكلاءهم”.
وكمل : “أي لاعب له دور في الضغط على النادي بتاعه علشان يلعب مع منتخب بلاده زيّ ما كان ميسي بيعمل مع برشلونة علشان يلعب مع منتخب الأرجنتين”.
وختم كلامه: “محمد صلاح هو السبب في فوز مصر، لازم يضغط على النادي علشان يقوم بدوره الوطني مع منتخب بلاده”.