في واقعة غريبة جدًا، حصلت داخل مستشفى فرشوط المركزي، ومستشفى نجع حمادي العام، واللي بسببها أخد المسئوليين المعنيين داخل وزارة الصحة قرار مصيري، حيث قرروا يرفدوا كل المسئولين في الهيكل الإداري في اتنين من أكبر وأهم المستشفيات العامة داخل محافظة قنا.
وأكد مصدر مسؤول في مديرية الصحة في محافظة قنا في صعيد مصر، عن قرار الوزارة بإعفاء الهيكل الإداري بالكامل لمستشفيات فرشوط المركزي، ونجع حمادي العام، من مناصبهم.
وعلى حسب المصدر اللي نقلت منه “القاهرة 24 ” الخبر، قال إن القرار الكبير والمصيري اللي تم اتخاذه في وزارة الصحة النهارده كان بسبب اكتشاف واحدة من أكتر الوقائع الغريبة في مصر، واللي فيها انتحل شاب صفة طبيب نساء، وقدر يقنع كل المسؤولين والعاملين داخل مستشفى فرشوط المركزي، ومستشفى نجع حمادي العام، وبالفعل اشتغل كطبيب نساء ممارس داخل المركزين الطبيين الأساسين في المحافظة لمدة خمس سنين كاملة. والغريب إن ماكانش في أي شكوك حول منتحل صفة الطبيب خلال الخمس سنين اللي فاتوا.
ووضح المصدر إن لجنة من مديرية الصحة والسكان في قنا، راحت لمستشفى فرشوط المركزي ونجع حمادي العام، علشان تحقق في الواقعة، واستجوبت عدد كبير من العاملين فيهم بخصوص واقعة تزوير الشاب ده لشهادة كلية الطب، والعمل داخل المستشفيين لمدة خمس سنين كاملة من غير أي شكوك، وقال الخبر إن الطبيب المزيف اشتغل في كذا قسم داخل المستشفيين منهم قسم الأطفال وقسم النساء وقسم العناية وقسم الاستقبال.
وقال المصدر إن التحقيقات أثبتت كون الشاب ده مزور ومنتحل صفة طبيب وعلى كده اعتبرت واقعة التزييف صحيحة وكان واحد من أول القرارات اللي خدتها الوزارة هي إحالة الهيكل الإداري في المستشفيين للتحقيق وإعفائهم من مناصبهم بالكامل.
ولسه متابعين الواقعة علشان نعرف أكتر عنها، وأول ما توصلنا معلومات أكتر عن اللي حصل واللي هيحصل، هنعرفكم على طول.