والله بعودة يا رمضان.. غاب عننا الشهر الكريم وافتقدنا أجواءه الروحانية، ولكن يفضل رمضان على عهده ويرجعلنا تاني بهلاله في ميعاده السنوي ونرجع نعيش أيام الصيام اللي مليانة خير وحب ورحمة مرة كمان. وفي ظل ده، إتجه كتير من صناع المحتوى على المنصات المختلفة لتقديم محتوى بنكهة رمضانية، ويمكن أفضلهم كان على تطبيق تيك توك، اللي حاليًا عليه ملايين من المشاهدين العرب والمسلمين، وعلشان كده قررنا نجمعلكم أفضل الهاشتاجز والفيديوهات على تيك توك اللي ليها علاقة برمضان.
RamadanVibes#
على الهاشتاج ده هتقدروا تتابعوا ألاف من صناع المحتوى على تيك توك بيشاركوا معاكم لحظاتهم الرمضانية. الهاشتاج عليه فيديوهات مختلفة من تجهيزات العزومات للقطات عائلية جميلة.
Ramadan_Preps#
أما هنا فهتلاقوا كل حاجة محتاجين تعرفوها من إزاي تعمل زينة رمضان في البيت لحد وصفات أكل سريعة ولذيذة علشان تقدروا تشاركوها مع الناس اللي بتحبوها في الشهر الكريم.
RamadanFamilyPic#
مفيش في رمضان أحلى من جو العيلة، وعلشان كده تيك توك عمل فيلتر جديد تقدر تنزل فيه فيديو ليك مع عيلتك احتفالًا بالشهر الكريم.
RamadanHealth#
على الهاشتاج ده هتلاقوا كل صناع المحتوى المهتمين بالطب وبالتغذية ونصايحهم لكم خلال الشهر الكريم.
GuessTheDish#
بمناسبة الشهر الكريم، تيك توك نزل تحدي جديد وفيه هتلاقي مكونات لوجبات عربية تقليدية مختلفة وعليك إنك تحزر إيه هي الوجبة، وتقدر تتفرج على كل التيك توكرز اللي بتحبهم وهم بيعملوا التحدي وتشارك فيه انت كمان على الهاشتاج ده.
RamadanStyle#
كتير مننا بيكون عاوز يلبس لبس رمضاني في الشهر الكريم بس مش بنكون عارفين لو كان هيليق علينا ولا لأ، دلوقتي تقدروا تتابعوا الهاشتاج ده وتاخدوا نصايح من صناع محتوى موضة كتير تعرفوا تظبطوا بيها الستايل بتاعكم.