من هوانم سكوير لوسط ناو: جروب الواتساب لكل منطقة

في حالة لو ماصادفتش قبل كده عشوائيات الجروبات على الواتساب، زيّ جروبات الجيران كده أو “جروبات الماميز” الدخيلة على مجتمعنا، احنا هناخدك في نزهة بين جروبات مختلفة علشان تشوف عشوائيات وغرائب وطرائف ممكن ماتكونش صادفتها قبل كده. الحقيقة الموضوع بدأ بجروب “هوانم سكوير” واحنا علينا الباقي، جمعنا من جروبات تانية، وتخيلنا لو باقي مناطق القاهرة ليهم جروبات على الواتساب، هيقولوا فيها إيه؟

جروب “هوانم سكوير” التجمع

بمنتهى اللذاذة، هوانم كمباوند في التجمع عاملين الجروب ده علشان يفيدوا بعض بحاجات في المنطقة، اللي محتاجة تعرف رقم خياطة مثلًا أو مكوجي، اللي بتسأل على دكتور كويس، اللي بتسأل على مكان مش عارفة تروحه ازاي فالباقي يوصفولها، أو حتى مشاكل بتحصل في الكمباوند بيفكروا ويلاقوا لها حلول. هما كمان بيتفقوا على خروجات، بس للأسف زينا كلنا نادرًا ما بتتنفذ، اسم الجروب نفسه يرجعك لمسلسل هوانم جاردن سيتي، ويخليك تتخيل صفية العمري وهي ماسكة موبايل وبتبعت على الجروب ده.

أشباح الهرم

دي أقل حاجة تستناها من شباب الهرم وفيصل وضواحيهم، أشباح فعلًا مش هزار، وفي اعتقادنا؛ اللي ممكن يتقال في الجروب ده هيبقى مناشدات للخناقات اللي بيثبتوا بيها إنهم أشباح، ورسايل من نوع “سيد شيبة معاه حكاية”، أو اقتراحات وترشيحات لأماكن لعب بلايستيشن، وأحدث الميمز في كل المجالات.

وسط ناو

وسط البلد بقالها كام سنة هي بؤرة الروشنة كلها، وانضمت لها مؤخرًا الزمالك كمان، دول مزيج من شباب الكليات الفنية اللي موجودة في الزمالك، والشباب العدميين على قهاوي وسط البلد، والشباب اللي مش فاهمة أي حاجة في دول بس عاجبهم شكل الموضوع ومنضمين كده بالحب، لو ليهم جروب أكيد هيتناقشوا فيه في مقولات دستويفسكي وأخر صيحات الباكت هات والقمصان الأوفرسايز وأروش رسومات للسكيت بورد. تفتكر لسه بيسألوا سؤال 2015 “مين في وسط ناو” ده؟

المعادي

هنا مش هنتخيل، احنا شوفنا مثال حي لشلة شباب المعادي والجروب بتاعهم على الواتساب والحاجات اللي بيعملوها في مشاهد من مسلسل “تحت السيطرة”، وده مش تشبيه لأي حاجة يا شباب، بس جروب المعادي ومين في أنهي سبوت عند أنهي كشك، ومين مصاحب مين، ومين عايز يصاحب مين، وآخر حواراتكم دي إيه؟ أكيد مش زيّ ما المسلسل كان بيركز بس على اللي بيشربوا مخدرات وكده، بس فكرة الخروج عند الأكشاك دي فكرة أصيلة فعلًا في المعادي.

شبرا يا دولة

عندهم اقتناع تام إنهم دولة فعلًا، شباب جدعان وبيدوا مثال للوحدة الوطنية، وشبرا من أقدم المناطق الأصيلة في القاهرة، جروباتهم فيها إعلانات لمشاريع صغيرة والجيران كلهم يدعموا، والإعلانات من غير مقابل مادي، ده غير إنهم جروبات جدعان لو محتاج أي حاجة أو بتدوّر على حاجة هيساعدوك من غير ثانية تفكير. شباب في جدعنة الفنان أحمد السقا.

أخر كلمة: ماتفوتوش قراءة: من الزمالك لمصر الجديدة: شوف أنت تبع أنهي شلة في دول