على مدار السنين اللي فاتت في نجوم بتظهر وبتقدر تكمل سنين بنفس نجاحها، وفي نجوم عملوا أغنية وحققت نجاح كبير لحد دلوقتي الناس بتسمعها، بس كانت بالنسبة لهم شبح وحمل عليهم، في اللي ماكملش بعدها واختفى وفي اللي كمل وماقدرش يوصل لنفس نجاح الأغنية دي وبعدها بشوية اختفى برضه. وفي القائمة دي هنعرفكم على النجوم دول.
هيثم سعيد – هما مالهم بينا يا ليل
فاكرين أغنية “هما مالهم بينا يا ليل”؟ حققت نجاح كبير في الوطن العربي ومصر، ووقتها هيثم سعيد كان لسه ماكملش 20 سنة، واللي ساعد في ده كمان إن الموديل اللي ظهرت معاه في الكليب كانت محجبة، ودي كان أول مرة نشوف حاحة زيّ دي. بعد الأغنية دي، عمل أعمال تانية، بس مالقتش نفس النجاح اللي عملته الأغنية دي، فقرر إنه يبعد عن الساحة الفنية في 2011 لحد ما رجع تاني للنشاط الفني في السنين القليلة اللي فاتت.
فرقة MTM – أمي مسافرة
“أمي مسافرة وهعمل حفلة بس ياريت ماتجيش على غفلة”.. الأغنية دي كانت الراعي الرسمي لأي شلة ولأي عيد ميلاد وقتها في 2003 بسبب ستايل الأغنية والكلام والطريقة اللي بيتغنى بيها والموسيقى المختلفة، وخصوصًا إن الوقت ده كان بداية ظهور فكرة الراب. مايكي وتاكي ومحمود، تلات شباب قرروا يعملوا فرقة وسموها MTM واختفوا بعدها، وبعد غياب 17 سنة رجعوا تاني في 2020 بكليب.
رانيا الكردي – شايف نفسك
مغنية وممثلة أردنية عملت أغاني قبلها وبعدها بس مفيش أغنية كانت على نفس المستوى ده، أغنية “شايف نفسك” كانت سنة 2006 واتصدرت كأفضل أغنية عربية لأكتر من شهر ورا بعض. وقبل الأغنية دي، عملت رانيا الكردي دور البطولة مع أحمد الفيشاوي في فيلم الحاسة السابعة، واختفت عن الساحة الغنائية وركزت على مجالات تانية زيّ الأعمال الخيرية والتمثيل وفي تقديم البرامج كمان.
علي حميدة – لولاكي
علي حميدة حقق نجاح كبير ماوصلوش حد من جيله وقتها بسبب أغنية لولاكي اللي طلعت سنة 1988، وكانت من كلمات عزت الجندي وسامي الحنفاوي. والنجاح بتاعها وصل إنه اتعمل فيلم على اسمها، واتباع من شريط الأغنية حوالي 6 مليون نسخة حوالين العالم، وبعدها عمل 5 ألبومات بس ماكنوش بنفس النجاح، وظهر في التمثيل في مسلسلات كضيف شرف في مسلسلات زيّ “ريح المدام” و”قسمة ونصيب” و”الهودج”.
فرقة جيتارا – يا غالي انشغل بالي
فرقة كويتية من أربع أشخاص بيغنوا وبيعزفوا؛ فهد وخالد ورناد ورهف، عملوا أغنية استمر نجاحها لأكتر من 15 سنة، بس أخبارهم انقطعت بعد أخر ألبوم لهم في 2008، وفي اللي غيّر مسيرته المهنية وفي اللي انشغل مع أسرته، بس رهف اللي فضلت على الساحة الفنية وعملت أغاني زيّ “كفى”.