من مخطوطة بطول 4 متر من كتاب الموتى لمقبرة ملكة فرعونية، دي آخر الاكتشافات من سقارة
من أربع شهور بس، العالم إتفاجئ باكتشاف 59 نعش خشبي في منطقة آثار سقارة بالقرب من هرم زوسر المدرج في الجيزة، بعدها بمفيش، أعلنت وزارة السياحة والآثار عن اكتشاف 100 تابوت خشبي ملون و40 تمثال جُداد، الشئ اللي دفع البعثات المصرية والأجنبية في المنطقة على التأكيد إن دي مجرد بداية لسيل من الاكتشافات في المستقبل.
وفي الأسبوع اللي فات ده، مصر أبهرت العالم مرة تانية بعد تصريح من وزارة السياحة والآثار باكتشاف حوالي 50 نعش خشبي، ومقبرة ملكة مصرية من المملكة القديمة ومخطوطة من “كتاب الموتى” الشهير بطول 4 متر.
عالم المصريات زاهي حواس في حوار مع الأهرام أعلن إن النعوش الخشبية بترجع لعصر المملكة الجديدة، وتم اكتشافهم في آبار دفن على عمق 10 متر تحت الأرض. التوابيت دي متزينة بآيات وصور من كتاب الموتى، اللي كان المصريين القدماء مؤمنين بإنها هتساعد المتوفيين يوصلوا للحياة الآخرة.
أما بالنسبة للمقبرة فهي بتعود للملكة نايرت زوجة الملك تيتي أول ملوك الأسرة السادسة في عصر المملكة القديمة.
والتنقيب بجوار هرم الملك تيتي بدأ في 2010، ومكانش معروف معلومات كتير عنه منها اسمه، لكن بفضل مجهودات علماء الآثار في العقد الآخير، قدرنا نحدد اسمه ونعرف عن عصره، وفي 2021، قدرنا ننقب مقبرة زوجته.
في لقاء مع قناة سي بي إس الأمريكية، العالم المصري زاهي حواس صرح إنه عمره ما سمع عن اسم الملكة نايرت قبل كدا، وللسبب ده هو بيعتبر دي قطعة مهمة من التاريخ المصري المفقود.
مقبرة الملكة احتوت على معبد و ثلاث مستودعات من الطوب اللبني فيهم أُضحيات وأدوات ومستلزمات، واسم الملكة منقوش على المسلة جنب مدخل المعبد وعلى جدار من جدرانه.
ومن الآثار المهمة في الكشف ده كان مجموعة من الأقنعة الخشبية، مذبح للإله أنوبيس، ومجموعة من التماثيل على شكل طيور، ولعب فرعونية قديمة، كمان كان في فأس برونزي، لوحات، وكتاب هيروغلوفية. بس يمكن الكشف اللي خطف الأضواء كان مخطوطة بطول 4 متر فيها الفصل الـ 17 من كتاب الموتى واسم صاحبها مكتوب عليها.
والسبب في كون منطقة آثار سقارة بقعة مهمة للاكتشافات الآثرية ده لإنها بتقع في قلب العاصمة المصرية القديمة منف وحتى لما العاصمة المصرية الفرعونية اتنقلت لطيبة في الأقصر في صعيد مصر، حافظت منف على أهميتها بكونها العاصمة الإدارية للدولة القديمة، عشان كدا سقارة كانت ومازالت من أهم المناطق في مصر من ناحية الإرث التاريخي والحضاري، وممكن هي في أهمية الأقصر في الشمال.