كتير مننا بيبقي عنده شغف في مجالات مختلفة وبيبقى نفسه يحقق ذاته، وبالذات في السن الصغير بيبقى في طاقة كبيرة وأحلام حدودها السما. ولكن الفرق بين شخص بينجح وشخص تاني بيفشل في تحقيق حلمه، هو إزاي بنختار نوظف الطاقة دي، وقد إيه بنتعب علشان نوصل للي إحنا عايزينه.
وبالنسبة للفنانة المغربية بسمة بوسيل، فهي بتعتبر مثال يحتذى بيه في النجاح والمثابرة اللي ألهمت كتير من الشباب وأقنعتهم إن النجاح والشهرة من سن صغير مش مستحيل تحقيقه، بس المهم تحديد الأولويات والتنازل عن بعض الأشياء أحيانًا في سبيل الوصول لنجاح أكبر وأهم. فتعالوا نشوف مع بعض مشوارها الفني وأهم الاختيارات اللي عملتها والمحطات اللي وقفت عندها.
مسابقة في ستار أكاديمي
بدأت بسمة مسيرتها الفنية سنة 2009 من خلال مشاركتها في البرنامج الغنائي الشهير “ستار أكاديمي” واللي كانت بسمة فيه واحده من أهم المتسابقين فحصلت ثلاث مرات على “Top 1” وكان حكام البرنامج بيشيدوا بصوتها الناعم والمميز. وكانت من أكتر الطلاب غنائًا من أول عرض ليها ووصولاً للنهائيات فشاركت بمجموع 45 أغنية، منهم منفرد، دويتو، وجماعي.
أعمال غنائية
بعد انتهائها من برنامج ستار أكاديمي، رجعت بسمة لبلدها المغرب وقامت بأغنية مغربية باسم “محال” غنيت باللغة المغربية اعتزازًا ببلدها وشعبها اللي دعمها واللي دايمًا بتتنتمي وبتفتخر بيه. ومن بعدها قامت بدويتو غنائي مع الفنان تامر حسني في أغنية “متسألنيش” واللي اتعملها فيديو كليب ولكن منزلش الفيديو للمشاهدين وتزوج بعدها تامر من بسمة. ولكن في بعض الأحيان بتقوم بسمة بغناء بعض أغاني تامر، فنانين عرب وكمان أجانب، وبتنزلها على صفحتها الرسمية باليوتيوب.
إطلاق بوتيك “بسمة كوزمتيكس” لمستحضرات التجميل
بعد الزواج من تامر سنة 2012، ابتعدت بسمة عن الغنى واختارت تنمي شغفها للموضة ومستحضرات التجميل، فأطلقت بوتيك خاص بيها، ومقره الأساسي في المغرب، اللي بتعرض فيه منتجات تجميل وكمان عندها صفحة على الإنستجرام بتعرض فيه أزياء، بالإضافة لأمكانية طلب منتجتها من موقعها على الإنترنت لأن في إمكانية الشحن لأي دولة في العالم والشرق الأوسط.