النهارده بتستقبل منطقة الأهرامات في الجيزة، مباريات دور الـ 16 لبطولة مصر الدولية المفتوحة للإسكواش البلاتينية للرجال والسيدات، اللي بدأت منافساتها التمهيدية يوم السبت 10 أكتوبر، وهتستمر فعالياتها ليوم 17 أكتوبر، البطولة بتعتبر من أكبر 8 بطولات بلاتينية عالمية، وبتقام في مصر برعاية وزارة السياحة والآثار، وبيشارك فيها 96 لاعب من 19 دولة مختلفة من الرجال والسيدات.
بجوائز مالية مجموعها 540 ألف دولار، يعتبر أكبر مجموع جوائز لبطولات الإسكواش الموسم ده، من بداية ظهور فيروس كورونا المستجد، كمان إقامة وتنظيم البطولة في مصر وسط تحديات بسبب الأزمة اللي سببها فيروس كورونا، بتعتبر إنجاز ورسالة للعالم كله إن مصر قادرة على مواجهة التحديات واستكمال الإنجازات اللي بتحققها في لعبة الإسكواش، والبطولة بتستضيفها منطقة الأهرامات في الجيزة، اللي بتعتبر أيقونة لمصر وأشهر المقاصد السياحية فيها.
في وقت يقال عليه العصر الذهبي للإسكواش في مصر، وبيستحوذ أبطال مصر على التصنيفات العالمية سواء كانوا رجال أو سيدات، البطولة بتقام ضمن برنامج الخدمة المجتمعية لبنك CIB، ووضع البنك خطة مستقبلية بتهدف خلق جيل جديد من الأبطال الناشئين للسعي لاستمرار استحواذ مصر على اللعبة لمدة 20 سنة.
البطولة من بدايتها لحد دلوقتي شهدت منافسات قوية ومفاجآت في نتاجها، بخروج حامل اللقب والمصنف الثالث عالميًا لرجال الإسكواش، كريم عبدالجواد، ونجح البطل المصري الصاعد مصطفي عسل، بطل العالم للناشئين والمصنف رقم 18 عالميًا، في التأهل لدور الـ 16 بعد ما فاز على الألماني سايمون روزنر المصنف الثامن.
