بتقسيمة أسامي الأجيال الروشة، سواء أنت روش وعارفها، أو زيي لسه عارف الموضوع ده واللي حواليك حسسوك إنك عتيق وفايتك حاجة خطيرة بإنك مش عارف الحوار ده، قولنا نتكلم فيه ونقول إيه تقسيمة الأجيال دي من امتى لامتى، وكل جيل اسمه إيه وصفاته كمان إيه. كده كده كل جيل وله ذكرياته وصفات مشتركة كده بين أبناء الجيل الواحد، لكن كمان الاختلافات بين كل جيل مش قليلة، خصوصًا لو بينهم سنين كتير، علشان كده عايزين نعمل قايمة بالأجيال، واسم كل جيل وصفاته.
Baby Boomer
وده جيل كان بيعاني بصراحة، أتولدوا بعد انتهاء الحرب العالمية التانية، والجيل ده تصنيفه من نص الأربعينات لنص الستينات، وبيُطلق عليهم كمان “جيل الطفرة” لإن في الأربعينات حصلت طفرة في عدد المواليد في أمريكا، علشان ظروف ما بعد الحرب وخسايرها والناس كانت عايزة تعوض الخساير البشرية دي وتبتدي صفحة جديدة بجيل جديد. وعلشان كده من صفات الجيل ده إنهم كانوا زيّ ما تقول كده شرارة البداية وشعلة النشاط.
جيل X
مصطلح بيُطل على جيل مواليد نص الستينات لحد نص التمانينات، الجيل اللي كبر على التلفزيون وألعاب الفيديو، دايمًا بيحبوا الأجواء اللذيذة وبيدوروا على حاجات وأنشطة تبسطهم، وعاشوا وقت ما طلعت شرايط كاسيت وألعاب فيديو كانت اختراع ماحصلش. رغم إن ممكن تحس إنه جيل قديم، بس الجيل ده هو اللي ابتدى طريق الفرفشة.
جيل Y
أو “Millennials” زي ما بيُطلق عليه، وده جيل ما بين نص التمانينات لنص التسعينات، روشنة وألوان ونقوشات ومزيكا بتعرفها من أول لحظة إنها من التمانينات والتسعينات، لكن برضه بيقدّروا القعدة مع العيلة، وكمان مبدعين في شغلهم، بس دلوقتي هما حاسين إنهم عجزوا خلاص بمجرد إنهم عدوا التلاتين.
جيل Z
جيل التكنولوجيا والاختراعات كلها، وبداية انتشار الكمبيوتر والإنترنت والسوشيال ميديا والعالم كله بقى قاعد مع بعضه، مافيش حدود، لكن شايل كتير كمان بسبب ده، سلاح ذو حدين زيّ ما بيقولوا، وبنحاول نستفيد بإيجابيات ونبعد عن السلبيات، ونستمتع بالتكنولوجيا اللي وصلنا لها.