فيديو انتشر على انستجرام وبعدها على كل السوشيال ميديا، لبنت بتصور أثناء ما بتتعرض لتحرش في الشارع اللي هي ساكنة فيه كمان! وفي الفيديو، المتحرش كان بيكمل عادي وهو عارف إنه بيتصور، وبيعتدي عليها لفظيًا ومش خايف من إنها بتصور وتوثق، كمان أبوه بدل ما يعترض على تصرفات إبنه أو يأدبه، بيزعق للبنت وكان بيحاول يضربها! البنت دي مغنية شابة اسمها ليللي كريا، صفحتها على انستجرام بيتابعها أكتر من 100 ألف شخص، علشان كده فكرة إنها تطلع لايف على صفحتها كانت فكرة ذكية ساعدتها في طريقها إنها تاخد حقها، وبالقانون.
المتحرش وأبوه عارفين إنها ساكنة في شارعهم، وده مامنعهمش من التعدي عليها، لأ وكمان الناس بتقول لها هي تسكت وكفاية كده عيب! بدل ما يقفوا معاها ضد أشخاص ماعندهمش أي إنسانية ولا نخوة، بينضموا لهم كمان في الجريمة! ليللي صوتها كان واضح في الفيديو وهي بتقول “مش معقول أنزل الشارع كل يوم حد يتحرش بيا” و”شكراً يا رجالة مصر يا اللي شاهدين على التحرش”.
يعني دلوقتي المفروض البنت تتعرض لمضايقات في الشارع ويتم التحرش بيها وتسمع ألفاظ وإيحاءات جنسية، وماتعترضش أو تحاول توقف المجرم عند حده، علشان المجرم بكل بجاحة هيهددها كمان بالزعيق والضرب لو اعترضت؟! بس لأ، البنت ماخافتش من مبدأ “خدوهم بالصوت” اللي المجرمين بيمشوا بيه ده، وبالفعل بعد الفيديو، عملت محضر وتم القبض على المتحرش، وحاليًا هو في النيابة وبيتم متابعة التحقيق معاه.
