ميمز ماينفعش تفوتها، وكده كده أكيد هتلاقيها في وشك في كل حتة، ويمكن تكون لسه مش فاهم الكلام على إيه ولا ليه الناس بتتكلم وتعمل ميمز عن البرجر، علشان كده هنقولكم الموضوع بدأ ازاي، وهنحطلكم أحلى ميمز اتعملت في التريند ده ماينفعش تفوتوهم.
الموضوع بدأ ببنت بتحكي عن علاقتها بخطيبها، اللي اكتشفت بعد 9 سنين إنه متجوز ومخلف، واكتشفت ده امتى؟ تاني يوم بعد قراية فاتحتهم، بالظبط زيّ ما قريت كده. بس عادي، قصة بنشوفها بتتحكي على السوشيال ميديا زيّ كتير من القصص اللي بنشوفها يوميًا، لكن اللي خلاها تنتشر وخلى فيها جانب مضحك شوية يستاهل الميمز اللي اتعملت وبقت في كل حتة، هو رد خطيبها نفسه عليها، واللي في أخره بيعايرها تقريبًا إنه عزمها على برجر.
بعد الرد الناري ده، ناس كتير ردت على التويت، وناس أكتر عملت ميمز عليها، والحقيقة إن كلهم حلوين ومسليين، وانتشروا مش بس على تويتر، كمان على فيسبوك، وبقى طبيعي دلوقتي إن وأنت بتعمل سكرول داون تلاقي كوميك عن البرجر، بس بعد المقال ده هتبقى عارف هما بيتكلموا عن إيه وتضحك.
الحقيقة الموضوع دخل تريندات في بعض، دلوقتي لو صاحبك هيعزمك على برجر، اعتبريه “ريد فلاج” واجري.