علاقة الجمال بالعرب قديمة ومتجذرة في التاريخ القبلي، وهي العلاقة اللي قامت على أساس الجغرافيا الصحراوية في منطقة شبه الجزيرة العربية، وده اللي خلى الجمال تتحول لرفيق العربي الدائم في سفره وترحاله وأعماله البسيطة.
وعلشان كده، الإبل والجمال جزء أساسي من التراث السعودي، من خلال مساعدتها للإنسان في التكيف مع البيئة الصحراوية وتوفير سبل المعيشة.
صورة الجمل مرتبطة في دماغنا بالصحراء والكثبان الرملية الممتدة على طول النظر، لكن المصور السعودي عبد العزيز الشمري، التقط مجموعة من الصور غيرت النظرة النمطية للجمال، من خلال توثيق واقع جديد ومختلف.
في صور الشمري بتظهر مجموعة من الجمال وسط الزهور والنباتات الزاهية في مناطق شمال المملكة العربية السعودية، اللي بتُزهر فيها زهور الخزامى والأقحوان، الصور أظهرت الجمال كأنها في عالم بنفسجي جديد علينا.
قال الشمري عن مجموعته الجديدة لموقع (CNN): “هذه الزهور تُضفي جمالًا على المكان مع وجود الإبل التي ترعى هناك”.
قضى الشمري سنين وهو بيوثق المشاهد دي، واللي انتشرت بشكل كبير على مواقع التواصل الاجتماعي خلال الخمس سنين اللي فاتت، وتم نشرها على مواقع عربية وأجنبية، ونالت إعجاب واستغراب الجماهير، اللي ماتعودوش على الصورة الزاهية دي للجمال والصحراء.
شارك الشمري في معارض فوتوغرافية مختلفة في السعودية، وحصل على جوائز كتير، وبيركز دايمًا في أعماله الفوتوغرافية على تصوير الصحراء والجمال والمناطق الجديدة اللي بتُظهر المملكة في إطار جمالي جديد وغير معروف.