بناء على تعليمات وزيرة الصحة بخصوص الاجراءات المتبعة للحد من انتشار فيروس كورونا، قررت دكتور هالة زايد تفعيل خدمة أخذ اللقاح في البيت، وده بالنسبة للأشخاص الراغبين في أخذ اللقاح من فئة كبار السن وأصحاب الأمراض المزمنة والغير قادرين على الحركة. وفعلًا تم تفعيل خدمة إنك تاخد اللقاح في البيت في أكتر من محافظة منها: المنيا والمنصورة ومطروح. ولكن طبعًا ده هيتم بشروط وبخطوات معينة، تعالوا نتعرف عليها بالترتيب.
خطوات طلب اللقاح
- تدخل على موقع التسجيل الإلكتروني الخاص بالوزارة وتبدأ بتسجيل البيانات الخاصة بيك، وهي الاسم والرقم القومي ورقم التيلفون.
- وبعدين هيجيلك رمز التحقق علشان يتأكدوا من صحة الرقم.
- وهيتم التأكد على وجود حساب واتساب لسهولة التواصل.
- وبعدها حدد المحافظة والمنطقة السكنية وأقرب مكان تاخد فيه اللقاح.
دي كانت الخطوات للتسجيل في طلب الحصول على اللقاح، واللي تعتبر مهمة قبل ما تطلب علشان تاخد اللقاح وانت في بيتك.
قراءة المزيد
خطوات تسجيل طلب الحصول على اللقاح في البيت
- بعد ما عملت كل الخطوات االلي فوق دي، هيتبعتلك رسالة فيها الرقم الكودي وفيها يوم الحصول على التطعيم.
- اتصل بعدها بالخط الساخن لوزارة الصحة، ورقمه 15335.
- اطلب منهم توفير اللقاح في البيت وده طبعًا بعد ذكر السبب.
الفئات المسموح ليها إنها تحصل على اللقاح في البيت
- في حالة وجود كسور في الأطراف السفلية (كسور في مفصل الحوض، كسور الساقين، كسور القدمين).
- وجود بتر في أحد الأطراف السفلية سواء قدم أو ساق.
- الأشخاص اللي بتعاني من مرض ضمور العضلات.
- الأشخاص اللي بتعاني من أمراض عصبية تسبب إعاقة الحركة زيّ مرض الشلل الرعاشي ومرض الوهن العضلي وضمور في النخاع الشوكي ومرض التصلب المتعدد.
- مرضى الشلل الرباعي والشلل النصفي وشلل الأطفال.