زيّ ما التكنولوجيا فادتنا بشكل كبير وساعدتنا وبتدينا مميزات أكتر بس في نفس الوقت أكيد لها عيوب. زيّ إنها قادرة وبكل بساطة إنها تقتحم خصوصيتك وتسرق بياناتك وتبتزك من خلال أشخاص مجرمين بيسيئوا استخدامها. وفي الفترة الأخيرة شوفنا حالات كتير من الابتزاز والتهديد الإلكتروني. وللأسف كم الأذى النفسي اللي بيتعرض له الضحية ممكن يوصل للانتحار وده فعلًا اللي بيحصل! ولإن اقتحام الخصوصية والابتزاز ممكن يحصل بطرق كتير منها إن حد يدخل يسرق كل بياناتك. جمعنالكم حاجات لازم نعملها وناخد بالنا منها علشان نحمي نفسنا من الهاكرز.
بطل تفتح لينكات ماتعرفهاش
الرابط المشبوه أو المجهول الهوية بقى من أقدم وأخطر الطرق اللي ممكن أي حد يهكر بها الموبايل. لو جالك رابط من حد ماتعرفوش أو من خلال sms أو الإيميل. بلاش تفتحه إلا لما تتأكد من المصدر اللي باعتهولك. ولو حد تعرفه هو اللي باعتلك اللينك تقدر تسأله هو اللينك ده فيه إيه قبل ما تفتح وتتأكد إذا كان الرابط بيبدأ ببروتوكول الاتصال المعروف “https” ولا لأ، لإن ممكن يكون الشخص اللي باعتلك هو أصلًا الجهاز بتاعه اتهكر.
لازم تعمل تحديث باستمرار
ناس كتير بتتجاهل الرسائل اللي بتتبعت علشان يعملوا تحديث للنظام، مع إنه مهم جدًا مش بس علشان فيه مميزات جديدة بتتضاف للتحديث. لأ، ده كمان بيتعمل من خلال التحديث ده سد لثغرات أمنية وإصلاح أخطاء في النظام. فممكن ببساطة واحد من الهاكرز يستغل الثغرة دي ويستغل إنك ماعملتش تحديث لنظامك ويخترق جهازك!
ماتستخدمش نفس كلمة السر
بنستسهل إننا نعمل نفس كلمة السر لكل أبليكيشن عندنا. فبنحط كلمة سر واحدة لكل حاجة على الجهاز وفاكرين إننا كده بنسهل على نفسنا. بس في الحقيقة احنا بنسهل على الهاكرز إنه لو قدر يفتح جهازك مش بس ياخد لفة في أبلكيشن واحد. لأ، ده هياخد لفة في كل التطبيقات.
ماتنزلش أي حاجة غير من الـapp store أو Google Play
القيود اللي بتفرضها الـapp store صارمة ومعقدة فهتلاقي إن من الصعب يبقى في أبلكيشن ضار لجهازك. لكن لو نزلت أبلكيشن من أي مكان هيبقى على مسئوليتك الشخصية فياريت ماتعملش كده. وزيادة في الأمان إلغي أوبشن Install unknown apps لإن ممكن بالغلط تنزل حاجة مجهولة المصدر وتعمل ضرر.
زيادة في الأمان نزل Antivirus
برامج الـ Antivirus مش مهمة بس للكمبيوتر أو الابتوب. لأ هي مؤخرًا بقت مهمة للموبايلات كمان. لإنها بتقدر تكتشف البرمجيات الإعلانية المدسوسة أو البرامج المشكوك إنها بتتجسس عليك أو بتسرق بياناتك.
خلي بالك من شبكات الواي فاي المفتوحة في الأماكن العامة
حاجة مغرية طبعًا لو لقينا شبكة Wi-Fi مفتوحة وببلاش. بس اللي أنت ماتعرفوش إن ممكن يكون هاكرز أو حد بيتجسس عليك وبيراقب أنت بتعمل إيه، وإيه المواقع اللي بتدخل عليها. فزيادة في الاحتياط ماتدخلش على الشبكة دي. ولو اتضطريت تستخدمه نزل تطبيق VPN علشان يحمي اتصالك.