5 تطبيقات هتساعد الأمهات في رعاية أطفالهم بشكل أحسن

لو أنت لسه جديدة في الأمومة، وحاسة إنك متلخبطة وسط المهام المطلوبة منك لرعاية طفلك، ومش عارفة تنظميهم ولا تنظمي وقتك، وعايزة تقدمي أحسن عناية ورعاية للطفل، في تطبيقات هتساعدك تنظمي مهماتك وأوقاتها على مدار اليوم، من رضاعة لنصائح عن التغذية ونمط النوم، لحد صور طفلك وذكرياتكم سوا.

بيبي كونكت

التطبيق ده هيساعدك على تتبع جدول أكل ونوم الطفل، ودرجة حرارته وحالته المزاجية، لإنه كمان بيقوم بتخطيط وجدولة البيانات اللي بتدخليها على شكل رسم بياني. وده هيساعدك تتابعي حالة طفلك بشكل منظم ومش هتنسي حاجة. التطبيق متوفر على (جوجل بلاي) و(آب ستور).

بيبي مونيتور

علشان تكوني شايفة طفلك وسامعاه عن بعد، التطبيق ده بيستخدم أي شبكة (واي فاي) أو (3G)، وهتستخدميه بسهولة عن طريق إنك تنزلي التطبيق ده على جهازين، وتسيبي موبايل منهم في غرفة الطفل، والتاني يكون معاكي، فتقدري تتواصلي مع طفلك عن طريقه.

بيبي فيد تايمر

أما التطبيق ده، هيساعدك تنظمي مواعيد الرضاعة وتعرفي آخر مرة رضعتي فيها طفلك، وكمان مدة الرضاعة. علشان كده التطبيق ده مهم لصحة طفلك وهيساعدك خصوصًا لو ده أول طفل ليكي وحاسة إن المهام اللي عليكي كتير ومش لاحقة تركزي فيها. التطبيق متوفر على (جوجل بلاي) و(آب ستور).

بيبي تراكر نيرسينج

ده كمان هيساعدك في تنظيم أوقات الرضاعة بجدول فيه توقيت بدايتها والانتهاء منها، وكمان هيساعدك بشكل كبير لو عندك توأم، مش هتنسي مواعيد رضاعتهم ولا تتلخبطي فيها لو استخدمتي التطبيق ده. وموجود على (جوجل بلاي) و(آب ستور).

وايت نويز بيبي

أما التطبيق ده، هيفيدك في تهدئة الطفل أو نومه، لإن متوفر عليه أصوات مختلفة زيّ صوت هدير المياه أو أصوات العربيات، والأصوات دي هتشغل طفلك عن إنه يعيط، كمان فيه خاصية تجنب الأصوات دي وقت نوم الطفل، وكمان خاصية الاهتزاز مع الأصوات علشان يجذب الطفل.

مهمات الأمومة مش سهلة، خصوصاً لو أول طفل ليكي، علشان كده التكنولوجيا بتسهل عليكي بحاجات زي دي، علشان مستحيل تفضلي فاكرة ومرتبة كل المواعيد والمهمات دي في دماغك. قولي لنا إيه كمان بيساعدك في العناية بأطفالك؟

آخر كلمة: ماتفوتوش قراءة: جمعنالكم تطبيقات هتساعدكم تحموا أطفالكم على الإنترنت..

تعليقات
Loading...