إسراء جعابيص أسيرة فلسطينية بتعاني من حروق وتشوهات ألتهمت أكتر من 60% من جسمها، الحملة أطلقها نشطاء من فلسطين وانتشرت في كل الدول العربية، على مدار شهور ولسه مستمرة بيطالبوا فيها سلطات الاحتلال الإفراج عنها أو على الأقل يقدموا ليها العلاج.
إسراء حصلها حروق بسبب إطلاق نار على عربيتها وهي بيتم التحقيق معاها في واحد من الكمائن الإسرائلية، وبعد الحادثة دي تم اعتقالها في سجون الاحتلال، وهي محتاجة أكتر من 8 عمليات جراحية علشان تقدر ترجع تاني تمارس حياتها بشكل طبيعي، لإنها بتعاني من حروق من الدرجة الأولى والتانية والتاتة وفقدت 8 أصابع ليها، ده غير التشوهات اللي موجودة الضهر والوش.
إسراء بتحارب الموت في السجون من 2015، واحدة في حالتها الصحية المفروض يبقى مكانها المستشفى مش المعتقل! ده بيزود آلامها أضعاف وبيخلي حالتها تدهور أكتر، وكل ده بدون أي نظرة شفقة أو رحمة منهم، لإنهم بيمنعوها من عمليات جراحية تقدر تساعدها في إنها تخفف آلامها. وكمان ممنوع إنها تشوف ابنها الوحيد، يعني انتهاك واضح لأمومتها.
الحملة لسه مستمرة على السوشيال ميديا لإنقاذ إسراء جعابيص وأسيرات تانييين بقالهم سنين في المعتقل وبيتعاملوا معاملة سيئة من انتهاكات وضرب وغيره، بس الناس عندها أمل إنهم يخرجوا للشمس وياخدوا حريتهم خصوصًا بعد ما سمعنا إنه تم فك أسر “أنهار الديك” بعد ضغوط شعبية وقانونية من منظمات وهيئات لدعم الأسرى.