مرتضى منصور راجع: إعلان ترشحه لانتخابات الزمالك وفيديو أثار جدل

بعد فترة من استبعاده من نادي الزمالك، مرتضى منصور بيفتح النار على مجلس إدارة النادي، وبيعلن ترشحه لانتخابات الزمالك، في فيديو على صفحته على فيسبوك، وأعلن عن 3 مخالفات حصلت في النادي، وهاجم كمان الدكتور أشرف صبحي وزير الشباب والرياضة، وكمان قال إنه هيظهر حقائق أكتر مثبتة بالمستندات في خلال الأيام الجاية، وقال إن جمهور نادي الزمالك عظيم وتوحد من أجل عودة الشرعية، والفريق بيكسب باللاعبين اللي هو جايبهم، واللجنة المعينة بتصرف من الفلوس اللي سايبها في النادي.

الـ 3 مخالفات اللي أعلن عنهم واعترف بيهم من بين 60 مخالفة وهمية ضد مجلس الإدارة بيتم التحقيق فيهم حاليًا، المخالفة الأولى كان في خطأ إجرائي في صرف شيكات للمقاولون العرب، وقال إن المسئولين بإدارة المالية بعد ما قاموا بتزوير تفويض لصرف الأموال من الخزينة، وقام عماد عبدالعزيز بإعادتهم مرة تانية.

المخالفة التانية كانت إن في ولد جاتله فاتورة كهرباء قيمتها 44 ألف جنيه، فصرفها مرة بالإيصال ومرة تانية بصورة الإيصال، أما المخالفة الثالثة فهي ليها علاقة بشركة قامت بعمل بعض اللافتات داخل النادي بقيمة مليون و200 ألف جنيه، إلا إنه تم صرف مليون و900 ألف جنيه من الخزينة، وقال إنه حوّل الشخص المسئول عن الواقعة دي للنيابة العامة من وقتها، وفي النهاية قال في الفيديو إنه بيعترف بالمخالفات دي لإنه راعي ومسئول عن رعيته.

وأعلن كمان إنه هيتقدم بشكوى رسمية للفيفا واللجنة الأولمبية الدولية ضد اتحاد الكرة المصري وضد وزير الرياضة، ووجه رسالة للدكتور أشرف صبحي، وقال إنه بقاله فترة بيجهز الملفات لإرسالها للجنة الأولمبية الدولية والفيفا، وقال إنه قدامه أسبوع تتم فيه ترجمة الملفات وإرسالها.

آخر كلمة: ماتفوتوش قراءة: بالصور: لمحات من تاريخ ديربي كرة القدم المصرية الأهلي والزمالك..