“أنا الزعيم” جملة قالها عادل إمام في مسرحية من مسرحياته ومن بعدها اتحولت حقيقة وبقى هو الزعيم، مسيرة عطاء استمرت لأكتر من 60 سنة، ناقش فيها مختلف القضايا في الوقت ده، اتكلم عن مواضيع شائكة بمنتهى الخفة والسلاسة، علشان كده معظم أفلامه وإن ماكانتش كلها معلقة معانا لحد دلوقتي.
أما بالنسبة لأعماله اللي اتناولت قضايا سياسية واللي اتعرض بسببها للتهديد فهي تعتبر كتير، هنتكلم النهارده عن معظمها.
السفارة في العمارة
فيلم اتكلم عن الصراع العربي الإسرائيلي، من خلال شخصية المهندس اللي لسه راجع من الخليج واكتشف بعدها إن سفارة إسرائيل في الشقة اللي قدامه، وهيتعرض لمشاكل كتير من بعدها وهيرفع قضية على السفارة ويرفض التطبيع مع إسرائيل، وهيختتم الفيلم بجملته الشهيرة “يا أنا يا السفارة في قلب العمارة”.
الإرهاب والكباب
” حاجات كتير هترخص وتبقى بسعر التراب، أنا وحضرتك والناس أجمعين”
فيلم تم إنتاجه سنة 1992، سيناريو وحيد حامد ولما وحيد حامد بيجتمع مع عادل إمام بيعملوا حاجة فوق العظمة، الفيلم بيتكلم عن مواطن مصري بسيط وأحلامه بسيطة ومش عارف يحققها، فتجبره الظروف إنه يشيل سلاح ويتقال عليه إرهابي، الفيلم كله بيدور تقريبًا في مجمع التحرير، ويمكن اختار وحيد حامد المكان ده بالذات لإنه بيعبر عن كل طبقات الشعب المصري ومشاكلهم وأحلامهم.
الإرهابي
فيلم اتقدم على الشاشة سنة 1994 من إخراج نادر جلال، اتكلم عن التطرف الديني والإرهاب بشكل جريء، واللي بسببه اتعرض عادل إمام لتهديدات كتيرة بسبب إن الفترة دي اتعرضت مصر لعمليات إرهابية كبيرة وخاصة في منطقة الصعيد، لدرجة إن الداخلية وفرت حراسة مشددة أثناء تصوير الفيلم.
طيور الظلام
هذا الفيلم خيال سينمائي بحت.. وأي تشابه بين الخيال والواقع يكون مجرد صدفة”
جملة اتقالت في بداية الفيلم بس حصل العكس تمامًا، اللي حصل إن الفيلم تنبأ بتفاصيل اللي حصل في البلد في الفترة الأخيرة، وهو اللي انتهت عليه الحال برموز النظام السابق والمعارضة في سجن واحد، اتكلم عن الإخوان وأعضاء الحزب الوطني والانتهازيين ومتلازمة الفساد.
حسن ومرقص
فيلم تم إنتاجه سنة 2008، اتكلم عن موضوع شائك وكتير بيتجنبوا يتكلموا فيه، اتكلم عن الفتنة الطائفية وازاي ممكن نتسبب في صنعها واحنا مش حاسين، وازاي ناس أصحاب رأي والمفروض إنهم عندهم وعي ديني وبيوجهوا الناس، ممكن يضللولهم بمنتهى السهولة.
مشوار عادل إمام الفني أكبر من إننا نتكلم عليه، لإنه “نمبر وان الحقيقي”، مشوار ماتعملش بالساهل يستحق تكريم عليه كل يوم.