وهران هي تاني أكبر مدينة في الجزائر بعد الجزائر العاصمة، وهي موجود في شمال غرب الجزائر، وتعتبر مركز اقتصادي وميناء بحري مهم جدًا، وهي واحدة من أهم مدن المغرب العربي.. وهي بتطل على خليج وهران في غرب البحر الأبيض المتوسط.. وعدت عليها حضارات كتيرة من العرب للأتراك للأوروبيين، واللي كل حضارة منهم سابت علامتها على تراث وثقافة المدينة.
تنوع ثقافة مدينة وهران خلاها واحدة من أكتر المدن اللي بتجذب السياحة في الجزائر وفي الوطن العربي عامةً، وبيتواجد فيها أماكن سياحية كتير، ففيها مناظر طبيعية وأماكن دينية وتاريخية، زيّ جبل مردجوجو، وقلعة سانتا كروز اللي اتبنت في أواخر القرن الـ 16، وكنيسة سانتا كروز اللي اتبنت علشان يحتفلوا بانتهاء مرض الكوليرا، وفي كمان قصر باي، ومتحف أحمد زبانة، ومسجد حسن الباشا.
واتعملت دراسة على طبيعة السكان في وهران سنة 2007، وبينت إن السكان الحاليين للولاية هما بنسبة 78% من أصل بربري وشرق أوسطي.
والجو في مدينة وهران دافي في الصيف وبارد في الشتا، وأحسن وقت نقدر نزور المدينة فيه من شهر يونيو لشهر سبتمبر، وهي واحدة من المدن الجزائرية اللي ماينفعش تروح الجزائر من غير ما تزورها، خصوصًا مع المعالم السياحية الكتيرة اللي فيها.
