رغم التعقيدات اللي التطور التكنولوجي بيفرضه أحيانًا علينا في مفهوم “الجمال”، إلا إن هيفضل دايمًا الجمال الحقيقي بيتجسد في البساطة، أكتر من أي حاجة تانية.. وإيمانًا بالاعتقاد ده، عمر كدوري صاحب حساب “moroccan minimalism” واللي بيطلق على نفسه “مصمم بالتدريب وبسيط بالطبيعة” قدر يثبت مفهوم البساطة أو “المينيماليزم” عن طريق تصميماته اللي برغم بساطتها، مليانة بالألوان اللي بتدي حياة للتصاميم اللي عليها.. فتعالوا نشوف مع بعض أجمل تصميماته اللي بتعتبر تجسيد للبساطة.
والمينيماليزم عمومًا هو مبدأ عام في الحياة بيتعلق بالسلوك البشري ناحية الحاجات اللي بنملكها وبنستخدمها، ودلوقتي بقت الماديات بتسيطر على الأفكار اللي بتخلينا مبسوطين، وبنظن إن لما يبقى معانا عربية غالية أو نشتري لبس كتير من ماركات عالمية أو إن علشان الجواز يبقى ناجح لازم نعمل فرح غالي جدًا أو غيره، هنبقى مبسوطين أكتر، بس في الحقيقة إن الحاجات دي ممكن أصلًا تزود علينا ضغوط الحياة، و هنبقى عايزين نشتغل أكتر أو نشتري حاجات كتيرة مش محتاجينها علشان نرضي الآخرين ونتبع المظهر العام، خصوصًا إن المجتمع بقى أهم أولوياته نظرة الآخرين.
وده مش معناه إنك متشتريش حاجات غالية، ولا تكسب فلوس أكتر، ولكن لو بتعمل كده بوعي فأكيد حياتك هتبقى أكتر بساطة وسهولة زيّ ما بيقول المثل الفرنسي : la simplicité fait la beauté (الجمال في البساطة).