مخدر “الشابو” هو الأخطر والأسرع قتلًا

بواسطة: رحمة حجاج

الفترة اللي فاتت بدأنا نلاحظ العنف في الجرايم، يعني مش بس جرايم قتل.. هي جرايم قتل بشكل عنيف جدًا!!

زي جريمة القتل اللي حصلت في الإسماعيلية وأخيرًا حادثة قنا اللي كانت عبارة عن إن شخص قتل والده ووالدته ومراته واتسبب في إصابة أخته وزوجها بإصابات خطيرة. والملفت للنظر إن اللي ارتكبوا الجريمتين كانوا مدمنين لنفس نوع المخدر، وهو مخدر “الشابو.”

مخدر “الشابو” بيتم إستخراجه من مادة اسمها “الميثامفيتامين” والمادة دي بتعتبر منشطة للجهاز العصبي بشكل كبير وخطر جدًا. أما بالنسبة لطريقة تصنيعه، فهو بيتصنع في المعامل في شكل بلورات أو حبيبات كريستالية بيكون لونها أزرق أو أبيض. وبالنسبة لطريقة تناوله فبيكون عن طريق إنه يتحرق ويتم إستنشاق دخانه عن طريق الفم أو الأنف أو عن طريق إن يتم إذابته في ماء مقطر والحقن الوريدي.

المتعاطي للمخدر “الشابو” لأول مرة بيفضل المخدر في جسمه لمدة أربع أيام وخلال الأربع أيام دول بيفضل المتعاطي في حالة يقظة تامة وبيبقى قادر إن هو يشتغل من غير أي توقف. ولو كرر الجرعة تاني بيبدأ يدخل في مرحلة الإدمان المستمر وفاعلية الجرعة بتفضل في جسم الشخص لمدة شهر كامل. أما بعد إنسحاب جرعة المخدر من جسم المتعاطي فممكن إنه يفضل نايم من غير أي حركة تمامًا لمدة يومين كاملين.

مخدر “الشابو” معروف إنه سريع الإدمان. وبيسيطر على المُتعاطي بشكل كبير وبيخليه غير مُدرك لتصرفاته. واللي بيأكد ده إن معظم الجرايم الكبيرة اللي بتحصل الفترة دي وجرايم القتل البشعة، اكتشفوا بعدها إن مرتكب الجريمة بيتعاطي مخدر “الشابو.”

من أعراض مدمن “الشابو” إنه بيبان عليه التوتر والعنف والهياج واتساع حدقة العين وبيكون عنده فرط حركة كتير ونشاط بشكل غريب. كمان بيبدأ يكون عنده هلاوس بصرية وسمعية. من أبرز أعراض إدمان مخدر “الشابو” هو فقدان الوزن بشكل كبير نتيجة إن المخدر ده بيتسبب في فقدان الشهية. مخدر “الشابو” بيدمر الجهاز العصبي للمتعاطي وبيسبب الجلطات وتشوهات كبيرة في الوجه.

مخدر “الشابو” كمان بيرفع ضغط الدم بشكل غريب وخطر جدًا وبطريقة مفاجئة وده بيتسبب في إنفجار شرايين المخ أو القلب وعلشان كده بيتسبب في وفاة المدمن أو متعاطي المخدر.

آخر كلمة: المخدر “شابو” يعتبر دلوقتي المصنف رقم واحد في درجة الخطورة!