بعد قرار منعه من الغناء: تعالوا نفتكر أزمات محمد رمضان اللي مابتنتهيش

أزمة جديدة بتتضاف لأزمات محمد رمضان، بس المرة دي طرفها نقابة الموسيقيين وهاني شاكر، بالرغم إن صدرت تصريحات قبل كده إن محمد رمضان “محصن” بسبب عضويته في نقابة المهن التمثيلية وكان مسموح له بالغناء بس تحت شروط معينة، ولما الشروط دي ماتنفذتش ساعتها هيبقى في إجراء ضده، وده اللي حصل في الساعات اللي فاتت لما خالف محمد رمضان الشروط والآداب العامة، بالرغم إنه وقع على تعهد لهاني شاكر إنه مش هيعملها، فقررت النقابة إنها توقف التصاريح اللي أدتها له وقالت إنها هتمنع أي تصاريح للغنا له تاني في المستقبل.

أزمات محمد رمضان مابتنتهيش

أزمته بسبب صورة مع إسرائليين

وقت لما انتشرت صورة له مع واحد من المطربين الإسرائليين ونزلت على صفحات إسرائيلية، ووقتها اتهموه بالتطبيع، وطلعت حملات على السوشيال ميديا بوقفه، ووقتها فتحوا التحقيق معاه بس بعد فترة تم حفظ التحقيق واكتفوا بوقفه لفترة مؤقتة وبعدها استأنف أعماله الفنية عادي.

أزمة الطيار الموقوف

ودي كانت تعتبر من أشهر أزماته في الفترة الأخيرة، وقت لما اتصور مع الطيار داخل كابينة القيادة اللي كانت تابعة لإحدى الشركات الخاصة، والتحقيقات انتهت بفصل الطيار نهائيًا عن العمل، وسحب الرخصة منه لمدة سنة، وكل ده كان بسبب صورة له معاه اتسببت في نهاية مسيرته المهنية، وللأسف الموضوع ماوقفش على كده، بعد الحادثة بفتره كرر محمد رمضان نفس المشهد واتصور مع مضيفات من ألمانيا داخل طيارته الخاصة.

تصريحاته عن إسماعيل ياسين

لما قال إن الأفلام اللي عملها واللي بتتكلم عن الجيش المصري كلها أساءت للجيش المصري بسبب تصرفاته المضحكه، واللي مالهاش أي علاقة بالجنود المصريين، والتعليق ده اتقابل بهجوم كبير باعتباره اتعدى على قيمة فنية كبيرة.

أزمته مع المنتج محمد سمير وصادق الصباح

كانت بعد تقديمه مسلسل ابن حلال وكنت أول بطولة درامية له، وبعدها اتعاقد مع رئيس شبكة الحياة في نفس الوقت اللي كان متعاقد فيه مع صادق أنور الصباح، وبسببها حصل أزمة كبيرة بين الشركتين وصلت للمحاكم وقرروا منعه من التمثيل لمدة سنة بس النقابة اتدخلت وحلت الأزمة بين الشركتيين.

أخر كلمة: ماتفوتوش قراءة: هجوم شديد: بعد وفاة الطيار أبو اليسر، هل محمد رمضان في موضع الاتهام قدام الناس؟