سببت حفلة محمد رمضان في مهرجان الجونة السنة دي جدل كبير بين المصريين. قدم رمضان في الحفلة أغنية”جو البنات” للمرة الأولى مع النجم المغربي ريد وان، وأغاني تانية لرمضان. غنى رمضان الحفلة كلها بلاي باك “بفلاشة” ومن غير أي عازفين معاه رغم قرار نقابة المهن الموسيقية بمنع الغناء بـفلاشة ومن غير 8 موسيقيين على الأقل مع المغني على المسرح.
ليه نقابة الموسيقيين مش بتطبق قواعدها على كل الناس سواسية
قال أحمد رمضان في تصريح خاص لـ”المصري اليوم“: “محمد رمضان وضعه مُختلف، لإنه مش مطرب، هو فنان استعراضي وليس أكثر، وهو يهوى الغناء، وأغنياته تعتمد على الاستعراض مش الغناء”.
وقال في التصريح: “رمضان بيعمل حفلاته مش للغناء وهذا ليس عمله، هو طالع يعمل شو مش أكتر، وقرار الفلاشة لا ينطبق على محمد رمضان”.
هل تصريح أحمد رمضان ده يبرر قرار النقابة بعدم تطبيق قواعدها على محمد رمضان؟
النقابة بتقول إن رمضان مش مطرب علشان تطبق عليه قواعد النقابة لكن نفس النقابة بتطبق قرارتها بصرامة على مُغنيين المهرجانات والرابرز المصريين زيّ حسن شاكوش وحمو بيكا وباتيستوتا ومروان بابلو.
لو النقابة بتعمل فئات للي بيقدموا المزيكا اللي بتنظم قواعد صناعتها، فإيه هو الأساس اللي بتقسم عليه مقدمين الفن في الفئات دي؟ هل بتقسمهم على حسب نوعية الإيقاع؟ محتوى الكلمات؟ طريقة الغنا؟
أي عنصر من العناصر اللي فوق دي لو اتطبقت على المحتوى الموسيقي اللي بيقدمه محمد رمضان هتلاقي إن رمضان بيقدم نفس النوع اللي بيقدمه كل مُغنيين المهرجانات اللي بتتسحب تصاريحهم وبيدفعوا غرامات وبيتمنعوا من الغناء علشان قرارات النقابة.
اللي بيكتب كلمات رمضان هما المدفعجية اللي كتبوا له كلمات نمبر وان ومافيا وعلى الله. اللي بيلحن لرمضان هما المدفعجية وإسلام الأبيض وشندي. الناس المسيطرين على صناعة المهرجانات الشعبية في مصر، ولو عملت سيرش على جوجل باسم أي حد فيهم هتلاقيهم كُتاب كلمات وملحنين ومطربين في مهرجانات كتير من اللي كلنا نعرفها.
بيقول الناقد الموسيقي محمد شميس في تصريح لمنصة “إضاءات”: “محمد رمضان مش مطرب، لإن اللي بيقدمه لا يتماشى مع مفهوم الطرب، هو مغني، وأرقام مشاهداته على موقع اليوتيوب بتأكد ده، وهو كان مُصمم يدخل عالم الغناء من بداياته”.
إذًا نوعية الأغاني اللي بيقدمها محمد رمضان ماتفرقش كتير عن نوعية المهرجانات. ولو على طريقة الغناء، فرمضان زيّه زيّ المغنيين الشعبيين؛ ماحدش فيهم بيلعب على قدرات الصوت وطبقاته والفواصل، ولا جايين يلعبوا على إستراتيجيات تدمج القدرات الصوتية مع اللحن والكلمات والتجربة الشعرية في الكلمات. ماحدش فيهم فيروز أو أم كلثوم بيلعب على تقنيات صوتية مُعقدة. هما بيقدموا لون خاص بيهم في الغناء مفيهوش تقنيات صوتية.
بالتالي مفيش أي حاجة تفرق ما بين رمضان وغيره من المغنيين الشعبيين، وقرار النقابة إنها ماتطبقش قراراتها على محمد رمضان بس مالوش أي أساس، وتصريح سكرتير عام نقابة المهن الموسيقية يُعتبر مُبرٍر غير مقبول.
طيب اشمعنى محمد رمضان النقابة مش بتطبق قراراتها عليه؟
في مقال منشور على منصة “إضاءات” بتاريخ 15 من الشهر الحالي بعنوان “الوصول للجونة: محمد رمضان المغني يتفوق على الممثل؟“. المقال بيناقش تفاصيل وأسباب نجاح رمضان من خلال وجهة نظر خبراء في علم الاجتماع والموسيقى والفن.
المقال بيشرح ليه رمضان قرر يدخل عالم الغناء من بداية مشواره الفني رغم إنه حقق أرباح كبيرة في عالم السينما، والمسلسلات.
في لقاء تلفزيوني قال محمد رمضان: “أنا نمبر وان في الطريق اللي اخترته في الغناء، أنا مش بغني رومانسي، أنا بغني لون مابيشبهش حد، وبالتالي أنا نمبر وان في اللون الخاص بيا في الغناء”.
وفي لقاء تلفزيوني تاني، قال محمد رمضان: “شعبية مايكل جاكسون تفوق شعبية آل باتشينو، وشعبية عبد الحليم حافظ تفوق شعبية أي فنان عربي آخر”.
إذًا رمضان داخل عالم الغناء وهو عارف هيغني إيه بالظبط وفاهم اللون اللي عايز يقدمه، وصريح بخصوص هو داخل عالم الغناء ليه؛ عايز يبقى نامبر وان، وعارف يستغل التريند ونوعية التفاعلات الاجتماعية ناحيته كويس جدًا، وعارف ازاي يقلب التريند لصالحه زيّ ما بيعمل مع الهجمات الإعلامية والاجتماعية الشديدة ضده.
بتقول دكتورة سامية خضر، أستاذ علم الاجتماع، في تصريح خاص لـ “إضاءات”: “محمد رمضان اتعلم كويس ازاي يقدر يبقى تريند وحديث الجمهور، الناس دايمًا بتدور عن المثير وهو بيوفر لهم جو الإثارة بشكل مستمر”.
وأضافت إنه بيستغل الجو اللي بيعمله بشكل مستمر، والمظلومية اللي بيتحط فيها بسبب انتقاد أبناء الوسط الفني له وبعض الجمهور، في صالحه وفي صالح تحقيق أكبر نسب مشاهدة، وخاصة في الأغاني اللي بيعيش فيها دور البطل، اللي أي حد عايز يبقى زيّه، وبالتالي ده كان سبب من أسباب نجاح رمضان. اللعب على احتياجات الناس ورغباتها هو اللي خلاه يحقق اللي وصل له”.
محمد رمضان والعالمية: إلى اللانهائية وما بعدها
بعد النجاح الكبير والأرباح من المصريين والعرب، رمضان قال يوصل للعالمية. عمل إعلان اتصالات مع فاندام، و«انساي» مع سعد لمجرد اللي له شعبية كبيرة في بلاد المغرب العربي وفرنسا، وبعدها عمل “يا حبيبي” مع ميتري جيمس، اللي عنده شعبية كبيرة في أوروبا ومشاهداته بتوصل لمليارات.
وبخصوص وصول رمضان للعالمية، قال الناقد الموسيقي محمد شميس: ممكن يوصل للعالمية لو استمر على نفس الخط اللي ماشي عليه، والديوهات اللي بيعملها مع فنانين عالميين أحسن دليل على كده. هو عارف عايز يوصل لإيه وبيعمله بتآني، واختياره للديوهات بيتم بعناية وذكاء منه”.
من وقت أفلام زيّ الألماني وعبده موته وغيرهم كان رمضان بيتعاون مع شباب المهرجانات وشحتة كاريكا علشان فهم إن الناس دي هي اللي واكلة مع جموع وطبقات الشعب اللي بتمثل الأغلبية، فتعاون معاهم وقلدهم بس قلدهم أحسن منهم علشان معاه الفلوس اللي مش معاهم.
بيقول محمد شميس: “رمضان بيتعاون مع عادل حقي لعمل هندسة صوتية لأغنياته، وجايب المدفعجية لكتابة الكلمات والألحان له، وحقق معهم نجاح كبير من بدايته في الغناء، زيّ مافيا، وحاليًا بيجيب نجوم المهرجانات يعملوا معه كلمات وألحان ناجحة”.
عادل حقى مهندس الصوت اللي بيشتغل مع عمرو دياب وعمل هندسة صوتية لأعمال دراما مصرية كبيرة جدًا، ومحمد رمضان بيتعاون مع مخرجيين كليبات كُبار جدًا. يعني بيعرف يوظف فلوسه علشان يخلق نسخة أغلى وأفضل من المهرجانات الشعبية بس بنفس كُتاب الكلمات والملحنين بتوعها.
وعلق شميس على نجاح رمضان: “نجاح محمد رمضان في الأغنيات دي لإنه بيعبر عن الناس بشكل واضح، والناس مرت بالتجربة اللي بيغني عنها، وهو مش بيغني عن نفسه في النهاية، رمضان بيغني للجمهور واللي يحبه الجمهور”.
دعم نجيب ساويرس لرمضان: وهل من بعد ساويرس دعم!
دعم ساويرس لرمضان غير مسار رحلة نجاحه بشكل كبير. فعلى حد تعبير ساويرس، محمد رمضان هو مايكل جاكسون مصر. استقبله في 2019 في الجونة للمرة الأولى، ومن اللحظة دي بدأ الدعم.
في البداية الدعم كان من خلال الإشادة بأغنية أو مسلسل، أو الوقوف جانبه في موقف، وبعدها بقى دعم مادي من خلال طلبه علشان يعمل حفلة في “زيد بارك” اللي يملكها ساويرس، والكلام الكويس عنه قدام كل الناس وأخيرًا اعتراف رمضان بفضل ساويرس عليه.