تم استدعاء شريف عامر ومبروك عطية بسبب حلقة على MBC Masr قال فيها مبروك عطية تصريحات اعتبرها البعض أقرب للفتاوى وهي أبعد ما تكون على الحقيقة والواقع.
الحلقة كانت بتتناول قضية الزواج في مصر، وبعض الأسئلة اللي ناقشها شريف عامر مع الدكتور مبروك عطية، واتكلم فيها عن الظروف الاجتماعية اللي ممكن تعرقل الجواز وإصرار المجتمع على إنهم يتمموا الزواج بنوع من البزخ على الرغم من صعوبة الظروف.
طب ومبروك عطية قال إيه؟
قال تصريحات الناس اعتبرتها أقرب للفتاوى، وعلى حسب كلام مجموعة من الصحف كانت سبب مباشر في استدعاء نقابة الإعلاميين للتحقيق معاه، وقال الشيخ مبروك عطية نصًا: “الزواج يكون واجباً في حالتين القدرة على الإنفاق، والقدرة على معاشرة المرأة، وثلاث أرباع الزيجات في مصر حرام، غير القادر على الباءة زواجتهم حرام، لافتاً إلى أن هناك من يقوم بأخذ جرعات من الأدوية من أجل الإنجاب وهذا حرام”.
وده الأمر اللي وصفه نقابة الإعلاميين في بيانها بإن الدكتور مبروك عطية نطق بما لا يعي بالمخالفة للحقيقة والواقع.
التحقيق في نقابة الإعلاميين
نقابة الإعلاميين في بيانها سردت أسباب استدعاء مبروك عطية وشريف عامر للتحقيق، وأشارت لمخالفته ميثاق الشرف الإعلامي ومدونة السلوك المهني، واستمرار الإعلامي شريف عامر في إرتكاب المخالفات المهنيه إما بالإتفاق مع ضيوفه أو السماح لهم بالكذب والتضليل والإهانه للشعب المصري. وحذرت من أخطاء القناة وقالت إن المحتوى اللي بيتقدم ضعيف ومش متناسب مع حجم الإنفاق في القناة ولازم يتم تحسين مستوى رسالتها الإعلامية.
ردود مباشرة من الأطراف المعنية
قال شريف عامر في حلقة بعدها “أنا هعرض لكوا الفيديو اللي تم الاقتصاص والاجتزاء منه والنقابة ماقدرتش تكمله لأخره، وقال أنا راجل بقالي 30 سنة وعمر ما اسمي كان الخبر ودايمًا بمشي مستقيم ومرفوع الرأس ومش هسمح لأي كائن إنه يقول إني متعمد أهين الشعب المصري”.
مخالفات مهنية على نفس القناة
- ياسمين عز ودعمها العنف ضد المرأة: شفي واقعة عروسة الإسماعلية بتقول عليها ست أصيلة علشان احتوت جوزها -اللي سحلها بفستان الفرح في الشارع- واحتوت غضبه وعدت الليلة وماخربتش بيتها، وقالت استحملي علشان بيتك وولادك، الرجالة طبعها حامي واحنا كستات مفروض نحتويهم، ضل راجل ولا ضل حيطة!
- تصريحات عمرو أديب عن ضرب الزوجات: اتهامه بارتكاب 12 مخالفة مهنية وإذاعة أخبار كاذبة عن تبني الدكتور أحمد الطيب شيخ الأزهر الشريف للضرب، وترويج شائعات إن الأزهر بيقف ضد صدور قانون لردع الضارب. وشجع على العنف الأسري بالإيحاء بإن ضرب الستات والبنات مالوش عقوبة قانونية في الوقت الحالي، ومفيش موافقة أزهرية عليه!
كلمة أخيرة:
مبروك عطية معروف بتصريحاته المثيرة للجدل، وناس كتير بتتابعه وبتسمع له ولازم يبقى في نوع من أنواع المسئولية في أي كلمة تخرج منه وعارف إنها ممكن تسبب جدل كبير وسوء فهم عند البعض وممكن ناس تستخدمها لإرضاء أهوائهم الشخصية تحت مسمى الدين وهما أبعد ما يكونوا عنه. وبتمشي على كلامهم، فمن البديهي إن هما يبقى عندهم مسئولية في أي تصريح بيصدر عنهم! مسئولية توصيل الرسالة الصح مسئولية كبيرة، والظهور على شاشة بيشوفها ملايين مسئولية أكبر، فلازم تعرف كويس أنت بتقول إيه ولمين والتصريح ده مجرد رأيك وعايز تلزقه في الدين وخلاص ولا هو حقيقة؟ وفي فرق كبير مابين الاتنين!
وهو مش أول مرة يستخدم في تصريحات تعابير مجازية من غير ما يوضح هو قصده بها إيه! وكان أخر تصريح له لما قال إن الست اللي ترفض إن جوزها يتجوز عليها هتروح جهنم! هو فين الدين أو الأية اللي بتقول ده أصلًا؟ هو أنت جبت الكلام ده منين؟ وليه بتتكلم إن الدين هو اللي بيقول كده، ومفيش أي حاجة في الدين قالت كده! أهوائكم الشخصية ماتتقلش على شاشة ومايتحطتش جنبها اسم الدين!