كل سنة جوجل بتطلع مؤشرات البحث السنوية، كلمات كل بلد دورت عليها، مطربين ومعلومات ومناسبات ووصفات، وبما إننا كلنا متوقعين إن أكيد كلمة “كورونا” كانت الأعلى بحث بكل لغات العالم، تعالوا نعرف أكتر حاجات العرب دوروا عليها في جوجل السنادي، وشكلت نتايج مؤشرات البحث السنوية لجوجل في العالم كله.
أكثر كلمات ظهرت في مؤشرات البحث السنوية في العالم:
السنادي كانت استثنائية، بكل أحداثها والمصايب اللي عدت على العالم فيها، جوجل لاحظت إن كلمة “ليه” هي أكتر كلمة العالم كله دوّر عليها في سنة 2020، ليه الكورونا اسمها كده؟ ليه غابات استراليا بتتحرق؟ ليه لازم نلبس ماسكات، وتخليدًا لذكرى سنة من أصعب السنين اللي حضرناها، جوجل طلعت فيديو من حوالين العالم، بيلم أكبر عدد من اسئلة “ليه” دي.
وعمومًا كورونا وبرنامج زووم والشغل من البيت، وطبعًا انتخابات أمريكا، أحداث لبنان واستراليا، هما الحاجات اللي العالم كله كان بيدور عليها في نفس الوقت.
شوف كمان: جوجل تفتح باب التقديم لتطبيق دعم الشركات.
في مصر:
الأغاني الشعبي مسيطرة جامد على دماغنا في 2020، وواخدة أول 5 أماكن في الأكثر بحثًا، تيجي بعدها مسلسلات رمضان وما وراء الطبيعة وLa Casa De Papal.
في السعودية:
في السعودية البحث بعد الكورونا كان على مواقع التعليم عن بعد، تجربة جديدة العالم كله كان متوتر منها ومش متأكد إذا كانت هتشتغل كويس مع أولادنا ولا لأ، كمان السعودين كانوا مركزين على انتخابات أمريكا جدًا، وبالنسبة للمسلسلات، فمحمد رمضان واخد المركز الأول في المسلسلات اللي كان بيدور عليها السعوديين.
لازم تقرا: الانترنت بيسأل ليه “فلسطين” مش موجودة على خرايط جوجل.
في الإمارات:
نتائج البحث في الإمارات بتقول أنهم مبيتابعوش مسلسلات عربي خالص تقريبًا، وكمان باقي اهتماماتهم من شخصيات وكلمات بحث، بتقول قد ايه هما مهتمين بأحداث العالم، خصوصًا لبنان بعد حادث المرفأ وايطاليا وقت انتشار الكورونا هناك.
في الكويت:
البحث في الكويت مطابق لكل دول العالم، الكورونا والتعليم الإلكتروني وماتش كورة وحيد.
أما عن تويتر:
لفترة طويلة فضلت تويتة للرئيس الأمريكي الأسبق باراك أوباما، هي التويتة الأكثر إعجابًا وانتشارًا على تويتر في تاريخه، لحد ما جت التويتة اللي اتنشرت من حساب شادويك بوزمان، الممثل الشاب إلى توفي بسبب السرطان فجأة في أغسطس اللي فات، وكانت التويتة صادمة ومؤثرة لدرجة إنها وصلت لـ 7.8 مليون إعجاب، وبقت أكتر تويتة تاخد لايكات على تويتر في تاريخه.
أما انستجرام:
دول كانوا أكتر الهاشتاجات اللي بيستخدمها شعب انستجرام على بروفايلاتهم، هتلاحظ معانا إن انستجرام هو المكان التطبيق الوحيد اللي مدخلهوش هاشتاج الكورونا.
#love
#instagood
#photooftheday
#fashion
#beautiful
#happy
#cute
#tbt
#like4like
#followme