أي بنت بتقرأ المقالة دي، هتبقى عارقة كويس أوي إحنا نقصد إيه من قبل ما نقول أي حاجة.. الكوافير مكان أساسي وجزء لا يتجزأ من حياة أي بنت، بس الموضوع بيختلف من حد للتاني، ففي اللي بيروح المكان علشان غرض معين ويمشي، وفي اللي بالنسبة له الكوافير ده بيته التاني، اللي بيعمل فيه صداقات مع الناس اللي هناك، بيرغي، وبيشرب كوباية الشاي اللي بتعدله مزاجه اليوم كله هناك. بس إيه الفرق بين النوعين دول؟ ليه في ناس بالنسبة لهم الكوافير ده مشوار لازم يتعمل وخلاص، وناس تانية بتستمتع بيه؟ ده بيرجع لطبيعة الكوافير وأسباب تانية كمان، فتعالوا نشوف إيه هي الأسباب اللي ممكن مشوار الكوافير أحلى حاجة فيومك، وممكن كمان تخليه كابوس..
الـ staff
ده تقريبًا أكتر عنصر بيفرق في الـ experience بتاعتك كلها وانت في الكوافير، فلما يكون الناس اللي بتشتغل هناك لطيفة كده ومرحبة، بتحسي إنك رايحة تتفسحي كده وتـ socialize مع ناس بتجيبلك طاقة إيجابية تكفيكي بقية اليوم.. بس لو هما بقى في موود وحش أو عندهم ضغط زيادة مخليهم متعصبين، الطاقة السلبية بتبقى لا تحتمل..
الزباين
ممكن تستغربوا من النقطة دي، بس لو فكرتوا شوية هتلاقوا إن إحنا عندنا حق.. لما تكوني قاعدة مثلًا مستنية دورك والبنت اللي جنبك تبدأ تفتح معاكي حوار، أو حتى وانت محتارة تختاري أنهي لون للشعر وحد يجيي يتطوع ويديلك رأيه، الموضوع بيبقى لطيف جدًا. أما بقى لما تبقي قاعدة وتحسي إن الناس بتبصلك بطريقة غريبة إلى حد ما، أو لما يحصل awkward eye contact كده بينك وبينهم، أو مثلًا يبدأ حد من اللي موجودين يزعق ويتخانق مع حد من اللي بيشتغل هناك.. الموضوع مابيبقاش ألذ حاجة.
الحوار اللي بيدور مع مصففة الشعر
إحنا اختارنا مصففة الشعر بالذات علشان هي أكتر حد عنده كلام ممكن يقولوا.. فلو هي لطيفة وبتفتح معاكي كلام في العموم الموضوع بيبقى مسلي خصوصًا إن عمايل الشعر بياخد وقت طويل.. أما بقى لو النقاش كان عبارة عن مجموعة أسئلة زيّ “مين اللي عملك اللون ده، وحش قوي” أو كلام عن قد إيه شعرك ناشف/دهني/مقصف/مُرهق وغيرهم من التعليقات دي كتير.. النقاش ده بيبقى كفيل إنك تكرهي شعرك وحياتك كلها واليوم اللي فكرتي تروحي فيه للكوافير!
شطارة طاقم العمل
طبعًا دي أهم حاجة صح؟ لما يكونوا الناس اللي هناك فاهمين هما بيعملوا إيه، ويعملولك اللون أو الـ haircut اللي كانت في دماغك، بتبقى أحلى حاجة بجد لإنهم بيساعدوكي تغيري وتوصلي للشكل اللي انتي عايزاه، أما بقى لما يكونوا بيمشوا بدماغهم هما ويقصولك شعرك كاريه مثلًا وانتي حلفتيهم مايقصوش غير الأطراف أو لما تقوليلهم عايزة صبغة بني فيضربولك شعرك أصفر أكسجين.. ده بيبقى الكابوس الحقيقي!