من المعروف إن عيد الحب اللي العالم كله بيحتفل به هو يوم 14 فبراير، بس عند المصريين بيحتفلوا به في يومين مختلفين عن بعض، زيّ ما بنعمل في يوم المرأة العالمي بالظبط، هتلاقي المصريين بتحتفل به بتاريخين مختلفين، اليوم العالمي المعروف اللي هو 8 مارس ويوم المرأة المصرية 16 من الشهر نفسه، ولإننا عارفين إن لازم كل يوم يبقى له قصة وحدوتة تتحكي، لقينا إن حدوتة عيد الحب بتاعة المصريين تستاهل إننا نحكيها.
سبب اختيار يوم تاني للمصريين علشان يحتفلوا بعيد الحب، كان سبب إنساني من الدرجة الأولى وخلى فعلًا لفكرة اليوم التاني ده لازمة، مش مجرد زيادة في عدد الأيام وخلاص، وده يمكن اللي كتير من المصريين مش عارفينه.
الموضوع بدأ من قصة نشرها الكاتب الصحفي مصطفى أمين في مقال له في جريدة أخبار اليوم سنة 1974، وكان بيتكلم فيها عن تجربة عاشها على أرض الواقع وهي اللي استلهم منها فكرة اليوم ده. جنازة في حي مشهور وشعبي زيّ السيدة زينب حضرها 3 أشخاص بس! ازاي ده يحصل في مكان شعبي زيّ ده وفي بلد معروف عنها إن الناس فيها بتجامل في العزا أكتر من الفرح! هتلاقي في أي عزا الناس بتروح وتقدم الواجب من قلبها، حتى لو الشخص اللي مات ده ماتعرفهوش بدرجة كبيرة، أو شافوه مرة أو مرتين بس في حياتهم، أو أخر مرة كان من سنين أو لو حتى صلة القرابة كانت بعيدة، بس برضه بتروح! لإن العزا عند المصريين هو نوع من أنواع الواجب المقدس اللي ماينفعش يتفوت، يعني ممكن يفوتوا فرح أو مناسبة سعيدة، بس عمرهم ما يفوتوا عزا، وكإنهم بيقدموا حاجة حلوة أخيرة لشخص مش هيشوفوه تاني.
فكان من الغريب على مصطفى أمين إنه يشوف 3 بس بيحضروا عزا واحد متوفي! كان شيء مؤسف وحزين بالنسبة له، ودي القصة اللي خلته يقرر إن يبقى في يوم لعيد الحب بس بشكل تاني خالص عن اليوم اللي العالم كله بيحتفل به. يوم تعبر فيه عن حبك بس للأهل والأصحاب والجيران وتبين لهم قد إيه هما مهمين في حياتك، عيد حب بس بمفهوم أوسع وأشمل وأكتر عمقًا. عيد حب لهدف نستحق إننا كلنا نشجعه ومانخليش اليوم ده مقتصر على جانب واحد.