تقارير صحفية إنجليزية فجرت مفاجأة قوية بخصوص مستقبل نجم فريق ليفربول، محمد صلاح، ورحيله عن النادي، مع حالة غموض حوالين مستقبله مستمرة من فترة.
عقد صلاح مع ليفربول هينتهي في صيف 2023، وفشلت إدارة ليفربول في الوصول لاتفاق مع محمد صلاح بخصوص تجديد عقده على الرغم من المفاوضات اللي استمرت شهور طويلة بسبب الاختلاف بين الطرفين حوالين المرتب.
على خطى ماني
صحيفة “ذا صن” الإنجليزية ذكرت في تقرير ليها إن ليفربول بيدرس السماح لمحمد صلاح إنه يمشي زيّ ساديو ماني. الصيف ده، ماني انتقل لبايرن ميونخ بشكل رسمي الأربع اللي فات مقابل 35 مليون جنيه إسترليني، وماني وضعه كان مشابه لمحمد صلاح، وكان المفروض عقده ينتهي مع ليفربول السنة الجاية وكان عاوز يزود مرتبه بشكل بيتجاوز سياسة الإدارة الحالية.
هيضطروا يبيعوه
“ذا صن” قالت إن الريدز عنده رغبة إنه يحافظ على خدمات محمد صلاح بس الإدارة ليها سياسة وهيكل للرواتب مش هتلعب فيه، وبيدرس النادي السماح لمحمد صلاح إنه يمشي في الميركاتو الصيفي الحالي لو وصله عرض قريب من 60 مليون جنيه إسترليني، ودي خطوة هتكون مفاجئة.
الأندية اللي ممكن تضم صلاح
أوضحت “ذا صن” إن نادي ريال مدريد يُعتبر من الأندية اللي بتراقب وضع محمد صلاح، كمان النادي الملكي هيكون قادر إنه يقدم صفقة كبيرة. ريال مدريد فيه عليه ملاحظة ممكن تكون مش جدية أصلًا، وهو التار اللي بين صلاح والنادي، ده بعد خسارته مرتين للقب على إيده، وده طبعًا في عالم الاحتراف كلام غير واقعي.
التقارير رجحت إن ريال مدريد ممكن يستنى سنة تانية علشان يضم محمد صلاح بشكل مجاني مع نهاية عقده، كمان موقف ليفربول بقى أكتر حدة بعد ما دفع 85.3 مليون جنيه إسترليني لضم داروين نونيز.
مُلاك ليفربول معروف عنهم الحكمة والحرص في التعاملات المالية للنادي، وممكن بشكل كبير يقرروا بيع محمد صلاح الصيف ده عشان يستفيدوا ماليًا منه، وفي الوقت نفسه عندهم تحدي إنهم يمنعوا بيعه لمنافس في الدوري الإنجليزي.