مع إنه دلوقتي طالع موضة وريحته في منتجات كتير بيفضلها جزء كبير مننا زيّ الشامبو أو الشاور جل أو البادي سبلاش أو البادي لوشن، لإنها مميزة وبتدي انتعاش طبيعي، وطبعًا هنركن على جنب التعليقات بتاعة “انتي ريحتك سوبيا” علشان هي فعلًا ريحة مميزة وبنحبها، كمان ممكن نستخدم جوز الهند في وصفات طبيعية مختلفة ومفيدة للبشرة والشعر، سواء جوز الهند أو زيت جوز الهند، تعالوا نشوف ممكن نستخدمه ازاي.
لتثبيت لون الشعر
وصفات جوز الهند مختلفة، وباستخدام زيت جوز الهند، ممكن تعملي طريقة بسيطة تثبتي بيها لون الشعر لفترة أطول أثناء الصبغة، هنجيب فوطة ومشط وطبق بلاستيك، ونحط 3 معالق من زيت جوز الهند، وصبغة الشعر، وندوّب الخليط، ونحطه بعدها على الشعر لفترة وبعدين نغسله.
غسول للوجه
ممكن نستخدم زيت جوز الهند ونستغل كونه مرطب طبيعي ومضاد للجراثيم، كغسول طبيعي للوجه، هنحط منه نقط على الوجه وندلك بحركات دائرية، وبعدها نشيل بقايا الزيت من على البشرة.
مزيل ميك أب
ممكن استخدام زيت جوز الهند كمزيل لميك أب العيون، خصوصًا الـ waterproof أو المقاوم للمياه، بطريقة بسيطة هنحط نقط من زيت جوز الهند على قطنة ونمسح بيها منطقة العين، كمان هيساعد في ترطيب المنطقة ويحميها من الجفاف.
لترطيب منطقة العين
علشان بنواجه صعوبة في إننا نلاقي مرطب كويس لمنطقة العيون، زيت جوز الهند ممكن يبقى حل مثالي وطبيعي لترطيب المنطقة دي من الجفاف بشكل آمن، هنحط طبقة خفيفة من الزيت أسفل العينين لترطيب وحماية المنطقة دي، ويفضل قبل النوم.
مقشر للبشرة
المرة دي هنستخدم لبن جوز الهند، بوصفة لتقشير البشرة هترجعها نضرة وحيوية، هنخلط لبن جوز الهند مع مسحوق الشوفان، ونستعمله كمقشر مرة أو مرتين في الأسبوع.
لعلاج حروق الشمس
لبن جوز الهند فيه خواص مضادة للالتهاب بتساعد على شفاء البشرة من حروق الشمس بشكل سريع، وكمان هيقلل الاحمرار والتورم اللي بيظهر على البشرة من الشمس، هنحط طبقة خفيفة من لبن جوز الهند على المنطقة المصابة ويفضل يكون قبل النوم، ونغسلها الصبح.