قناة القاهرة والناس أعلنت عن خريطتها البرامجية في شهر يونيو، واللي بتتنوع بين برامج حوارية بتناقش قضايا مهمة من كل الزوايا وبتستضيف خبراء في كل المجالات، علشان نقدر نسمع كل الآراء، وبرامج لايف ستايل بتهتم بأذواق الجمهور بطريقة مختلفة زي الطبخ، لمسلسلات مختلفة فيه منها اللي اتعرض في رمضان اللي فات وحققت نجاح كبير، ومنها اللي اتعرض من كذا سنة وحقق نجاح وقررت القناة بثه تاني، تعالوا نشوف إيه البرامج والمسلسلات اللي ضمن خريطة الشهر ده على القاهرة والناس.
برنامج “حديث القاهرة”
رجوع برنامج “حديث القاهرة” لـ “إبراهيم عيسى” و”خيري رمضان” و”كريمة عوض”، البرنامج من تقديم “خيري رمضان” و”كريمة عوض” من السبت للثلاثاء، وإبراهيم عيسى من الأربعاء للجمعة، الساعة 9 مساءً. “حديث القاهرة” برنامج إيقاعه سريع ورشيق ومحتواه جذاب، بيهتم بمناقشة القضايا إللي بتشغل الشارع السياسي المصري والعربي والدولي، وكمان بتلقي الضوء على اهتمامات المواطن المصري، وبيناقش القضايا الدولية ويحلل أبرز الأحداث اللي بتحصل في مصر، مع نخبة من كبار الضيوف والمتخصصين في كل المجالات، وبيُلقي الضوء كمان على أبرز المشروعات القومية في مصر.
البرنامج بيحتوى كمان على فقرات متخصصة أسبوعية:
مع الدكتورة “نهاد أبو القمصان” في “نهاد لها رأي آخر” .
ودكتور “محمد الجندي” في “هل أنت مراقب؟”
و”بورصة الكلام” مع “خالد البرماوي”.
برنامج “مي شو”
بعد نجاحها في مواسم كتير لبرنامجها وتألقها في برنامج “مي شو” على قناة القاهرة والناس، بترجعلنا من جديد “مي يعقوبي” مع أشهى الأكلات والوصفات في برنامجها، اللي بيقدم أفكار مختلفة، ومأكولات من كل حتة في العالم، وبشكل يختلف عن برامج الطبخ التقليدية.
كمان بيعتمد البرنامج على تقديم وعرض عدد من الثقافات المختلفة للبلدان، وعلاقاتها بالأكل، وثقافة الشعوب في الأكلات الشعبية الخاصة بكل بلد، بالإضافة لإن القناة اعتمدت على وجود شكل بصري جديد للبرنامج يتماشى مع الأفكار الجديدة والذكية في الطبخ، ورغم إن ليها منافسين كتير على شاشات القنوات الفضائية، لكن فيه رغبة دائمة للمشاهدين في متابعتها وإنهم يعرفوا كل جديد باستمرار من خلال طريقتها السهلة البسيطة التي بتوصل لقلوب الناس بطريقة إيجابية.
المسلسلات
بعد نجاحه في رمضان، قناه “القاهرة والناس” بتعرض مسلسل “أولاد ناس” عرض حصري بداية من يوم السبت ١٩/٦ الساعة 8 مساءً، بالإضافة لمسلسل “زواج بالإكراه” اللي بيتعرض الساعه 8 مساءً. وكمان مسلسل “ليلة”الساعة 7 مساءً.