بعد الأزمة الصحية اللي اتعرضتلها الفنانة ياسمين عبدالعزيز وقلقت جمهورها ومحبيها، وانتشرت أخبار كتير بمعلومات متضاربة عن حالتها الصحية، اللي ماصرحش بيها حد من القريبين لياسمين، وكانوا بيطلبوا الدعاء ليها بس، الكلام انتشر عن حدوث خطأ طبي لياسمين أثناء إجراء عملية جراحية، وفي قالوا إنها بتعاني من مضاعفات للعملية، ودخلت في غيبوبة لفترة، لكن الحمدلله حالتها حاليًا بتتحسن وصرح شقيقها عن قرب موعد خروجها من المستشفى، لكن علشان نتفادى انتشار الأخبار من مصادر مختلفة تضر بالأطباء وبحالة المريض، لازم يكون في حل رادع للتصدي للتصرف ده. خصوصًا مع توضيح نقابة الأطباء للفرق بين المضاعفات والخطأ الطبي.
نقابة الأطباء بعد أزمة ياسمين عبدالعزيز بتطالب بإصدار قانون المسئولية الطبية في مصر زيّ باقي العالم، وصرح الدكتور أسامة عبد الحي، أمين عام نقابة الأطباء، إن القانون ده بيمثل درع الحماية للطبيب والمريض، ووضح إن اللجنة الطبية هي اللي بتحكم إذا كان حصل للمريض خطأ طبي، أو اتعرض لمضاعفات طبية، والتقرير بيتم رفعه للمحكمة في حالة تحويل القضية للمحكمة.
الفرق كبير بين الخطأ الطبي والمضاعفات، وحسب توضيح أمين عام النقابة، إن المضاعفة لا تعني أي تقصير من الطبيب، لكن احتماليتها موجودة ولو بنسبة 1%، لإن أي عملية جراحية لا يمكن توقع نجاحها بنسبة 100%، كمان الإقرار اللي بيتم توقيعه من أقارب المريض قبل إجراء الجراحة مش بيعفي الطبيب من المسئولية في حالة حدوث خطأ، والخطأ الطبي بيحصل نتيجة تقصير من الطبيب ولازم يتحاسب عليه.