في خطوة هتزوّد من معاناة الشعب اللبناني ماديًا ومعنويًا في ظرف صعب بيعيشوا فيه من سنين، وهتؤدي في الغالب لارتفاع أسعار الوقود وتقلبها بشكل كبير، وزيادة الضغط على العملة المحلية اللي بتفقد قيمتها بشكل متفاوت.
إيه اللي بيحصل في لبنان؟
متحدث باسم مصرف لبنان المركزي قال لرويترز إن المصرف وقف بشكل تام عن توفير الدولار لواردات البنزين في خطوة أدت لارتفاع أسعار الوقود بشكل كبير مرة واحدة. مصرف لبنان المركزي قال السنة اللي فاتت إنه هيوقف توفير الدولار بأسعار الصرف المدعومة بسبب تضاؤل احتياطات البلاد من العملات الأجنبية، بس واصل القيام بده بسعر أقل من أسعار السوق في منصته للصرافة اللي اسمها “صيرفة”، وده في إطار خطة أوسع لإنهاء دعم أغلب البضايع مع انهيار مالي دخل سنته الرابعة بدون أي مؤشرات على التحسن.
المتحدث باسم المصرف قال إنه هيتعين على المستوردين دلوقتي الحصول على الدولار من السوق السوداء، اللي بيتم تداول الليرة اللبنانية فيه بحوالي 35 ألف مقابل الدولار، وكان السعر في “صيرفة” الأسبوع اللي فات وصل لحوالي 28 ألف.
مارون شماس، عضو تجمع الشركات المستوردة للنفط، قال لرويترز لو زادت التقلبات في سعر الصرف هتزيد التقلبات في سعر الوقود، وزاد سعر ال20 لتر من البنزين حوالي 20 ألف ليرة النهارده، وهي زيادة حادة مقارنًة بتقلبات يومية عادية. وأضاف شماس إن المستوردين قادرين لحد دلوقتي يحصلوا على كل احتياجاتهم من الدولار من السوق السوداء، وإن القائمين على ضخ البنزين في السوق هيواصلوا قبول الدفع بالليرة بحسب سعر السوق السوداء اليومي.
جذور الأزمة الاقتصادية في لبنان
في تقرير للبنك الدولي في شهر يناير اللي فات، اتقال إن حجم ونطاق الكساد المتعمّد اللي بيشهده لبنان حاليًا هيؤدي لتفكك النظام الاقتصادي للبلاد اللي ماشيه عليه من وقت انتهاء الحرب الأهلية. وبيظهر الانهيار في الخدمات العامة الأساسية مع استمرار الخلافات السياسية الداخلية ونزيف رأس المال البشري وهجرة الكفاءات على نطاق واسع، وفي المقابل بتتحمل الفئات الفقيرة والمتوسطة العبء الأكبر للأزمة.