لأول مرة في العالم العربي، البرلمان اللبناني أجاز النهاردة زراعة الحشيش للاستخدام الطبي في وقت لبنان بتمر بيه بأكبر أزمة اقتصادية في تاريخها الحديث.
بعد ما الدولة الشامية أعلنت إفلاسها في الربع الأول من 2020، دخول العملة الأجنبية البلد أصبح شيء صعب، لكن النواب شايفين إن الخطوة دي ممكن تشجع دخول عملات مختلفة للبنان لو تم تصدير المحصول للخارج.
وعلى الرغم من إن زراعة الحشيش كانت غير قانونية في لبنان، إلا إن النبتة بتتزرع علانية بقالها فترة في كذا مكان من أهمها سهل البقاع في شرق البلد وده بعلم الحكومة.
آلان عون من التيار الوطني الحر عَبر عن إن في تحفظات أخلاقية وإجتماعية عند نواب كتير، لكن مفيش حل تاني في ظل الظروف الاقصادية اللي البلد بتمر بيها. خصوصًا إن كميات كبيرة من الحشيش كانت بتتزرع في السر من غير معايير، لكن دلوقتي بإشراف حكومي الوضع هيختلف، والقطاع الجديد ده هيطور الزراعة في لبنان وهيدخل سوق جديد بهامش ربح كبير وده شيء في جوحهة نظره يستحق المحاولة.
وطبقًا لتقرير من بلوومبرج، فزراعة الحشيش هتدخل حوالي مليار دولار عائد للبنان كل سنة، رقم كبير جدًا البلد محتاجاه في وقت صعب زي ده.