بواسطة منة حسني.
من تاريخ عريق بيرجع آلاف السنين لجمال طبيعي ملوش مثيل في الوطن العربي، لبنان فريدة من نوعها. وللأسف البلد الشاميّ الجميل بيمر حاليًا بظروف صعبة بعد انهيار اقتصادي ناتج عن سوء إدارة لمواردها واضطراب سياسي بسبب عدم رضا شعبها عن القيادة، لكن بعد ما انفجار مفاجئ في مرفأ بيروت سلب أكتر من 100 روح وأدى لحوالي 4000 أصابة، زاد الطين بلة، ومعاناة لبنان زادت أضعاف.
لبنان بلد جميل، وأهلها من أطيب وأجمل الشعوب في عالمنا العربي، تعالوا نشوف أحلى أماكن في لبنان محتاجين تزوروها أول ما الأزمة تتحل.
وادي قديشا
من أجمل وأعمق وديان شمال لبنان ويبعد عن بيروت بحوالي 120 كيلومتر وفي عمقه نهر قديشا؛ وبيتميز بالطبيعة المميزة والخلابة والهدوء اللي بيعكسه على الزوار ومن أهم المعالم القريبة من الوادي مقر الكنيسه المارونية ودير مار أليشا الشاهد على ولادة الرهبنة المارونية اللبنانية في سنه 1695م.
محمية الشوف
أكبر محمية طبيعية في لبنان ومكانها في وسط جبل لبنان بيميز طبيعيتها والمحمية لوحدها مساحتها حوالي 5% من مساحة لبنان.
في المحمية دي في أنواع كتير من النباتات النادرة والحيوانات المستوطنة، ومنها أكبر أنواع الثديات المهددة بالانقراض والطيور البرية زيّ بومة النسر والنعار السوري.
بعلبك
من أقدم المدن التاريخية في لبنان، بعلبك كانت ملتقى الطرق البرية التجارية على مر العصور، ومليانة بالآثار الرومانية من معابد وهياكل، ويعتبر معبد جوبيتر هو الأكثر ضخامة بين معابدها، وجذبت بعلبك مهرجانات فنية دولية كتير حصلت على أرضها. سماها الرومان زمان اسم هليوبوليس، أو مدينة الشمس، وفي العصر الأموي سماها الأمويون القلعة.
جبيل
من أقدم المدن الآثريه اللي إتبنت سنة 5000 سنة قبل الميلاد واللي بتعتبر أقدم مدن العالم مش بس لبنان من حيث النشأة، وكان أساسها قرية للصيد ومع مرور الوقت بقت مدينة معتمدة على التجارة والسياحة وفيها معالم أثرية وقديمة كتير زي السوق القديم وقلعه جبيل والميناء ومتحف جبيل.
محمية جبل موسى
مكانها بالظبط في قضاء كسروان في لبنان في المنحدرات الغربية على جبال لبنان بتطل على البحر الأبيض المتوسط من جهة الغرب والمحمية فيها وبالقرب منها قرى كتير جميلة وتستحق الزيارة زي يحشوش وقهمز ونهر الذهب وتعتبر محمية جبل موسى وكل مايحيط بيها جزء من شبكة اليونسكو.
والمحمية بتضم برضه أنواع نادرة وجميلة كتير من النباتات والحيوانات البرية والطيور المهاجرة المهددين بالانقراض.
