ضمن خطة الدولة لتوفير الحماية لجميع شرائح المجتمع ومن ضمنها طلاب المدارس، لأول مرة تم تفعيل التأمين الإجباري على حياة طلاب المدارس ضد الحوادث والوفاة الطبيعية برسوم رمزية لا تتعدى بعض الجنيهات، في أكبر تغطية تأمينية للطلاب في تاريخ مصر، هيتم تطبيقها في موسم الدراسة الحالي.
بداية القرار كانت من مجلس الوزراء المصري من عدة شهور، والتطبيق هيتم عن طريق إنشاء صندوقين للتأمين على طلاب المدارس، الصندوق الأول خاص بالتعليم الأساسي بيشمل كل أنواع التعليم التابعة لوزارة التربية والتعليم اللي بيصل عدد الطلاب فيها لأكتر من 20 مليون طالب من طلاب المدارس الحكومية والخاصة واللغات والدولية بكل أنواعها وكمان التعليم الفني، أما الصندوق التاني خاص بالتعليم الأزهري وبيوفر التغطية التأمينية لطلاب مرحلة ما قبل الجامعة وبيمتد كمان لطلاب الجامعات الأزهرية، اللي بيصل عددهم لأكتر من 2 مليون طالب.
رسوم الإشتراك في التأمين وطرق تحصيلها هتحددها الجهات التابع لها الصندوقين سواء وزارة التربية والتعليم أو الأزهر، لكنها هتكون أسعار رمزية، والتأمين هيشمل الحماية ضد أخطار الوفاة الطبيعية أو الناتجة عن الحوادث، والإصابات البدنية وأي عجز ينتج عنها سواء كان عجز جزئي أو كلي، وتغطية تكلفة إجراء عمليات جراحية وكمان تكلفة العلاج لكن بالحد الأقصي اللي بينص عليه مبلغ التأمين، كمان التغطية التأمينية بتمد لتقديم إعانات إجتماعية للطلاب في المحافظات النائية.
