مافيش حاجة بتشغل الرأي العام الرياضي ومحبين الكورة في مصر إلا أزمة اشتعلت فجأة كان بطلها خالد الغندور وتدويناته على فيسبوك، اللي بسببها وجه الأهلي اتهام لخالد الغندور بإثارة الفتنة بين الجماهير العربية والتحريض على جماهير الأهلي في الدار البيضاء. وهنا هنحاول نعرف إيه الحكاية وترتيب الأحداث.
الأهلي وشكوى الأعلى للإعلام
قرر مجلس إدارة الأهلي يوم التلات 4/19 الصبح، إنه يقدم شكوى للمجلس الأعلى للإعلام ضد لاعب الزمالك السابق والإعلامي خالد الغندور، بعد ما كتب تدوينات على حسابه على فيسبوك وصفها الأهلي بإنها غير حقيقية وبتحرض جماهير الرجاء المغربي ضد الأهلي، اللي هيلعب هناك مباراة العودة في دور الثمانية لدوري أبطال أفريقيا، يوم الجمعة الجاية في ملعب محمد الخامس.
كمان الأهلي، في الشكوى اللي قدمها، طالب باتخاذ الإجراءات القانونية ضد الغندور علشان بيُثير الفتنة بين الجمهورين المصري والمغربي وبيخلق أجواء غير طيبة، واتهموه بإن دي مش المرة الأولى اللي يعمل فيها كده، وإن ٢٠١٨ شهدت تصرف مماثل منه قبل ماتش الأهلي والترجي التونسي في نهائي دوري الأبطال، وفي ٢٠٢٠ كمان قبل ماتش الأهلي والهلال السوداني في دوري المجموعات في البطولة نفسها.
رد خالد الغندور على الشكوي كان إيه؟
اعتذر خالد الغندور بعد الشكوى والضجة اللي حصلت من كلامه، وقال “بعتذر لكل اللي فهم كلامي غلط، ومش عايز حد يزعل مني، أنا كنت بتكلم في الكورة بحسن نية في إطار المنافسة بين الأهلي والزمالك”.
وأضاف “أنا أبويا كان أهلاوي، وأنا صديق لكل اللعيبة الأهلاوية وبعض أعضاء مجلس إدراته”، وأنهى “النادي الأهلي اتهمني إني بثير الفتن وأنا أبعد ما يكون عن ده، أنا مش بحب العدوانية وبتمنى السلامة للجميع “.
إيه اللي حصل خلى الغندور يعمل كده أصلًا؟
ماتش الأهلي والرجاء اللي أقيم في القاهرة شهد حالات تحكيمية مثيرة للجدل وده لما احتسب الحكم ركلة جزاء لصالح الأهلي في الدقيقة العاشرة، والحكم خد القرار على أساس إن الكورة لمست إيد لاعب الرجاء قبل ما تظهر الإعادة إنها جات في ركبة اللاعب. خالد، اللي له برنامج في قناة “الزمالك”، هاجم الحكم على فيسبوك، وكمان هاجم حكم تقنية الفيديو، وحتى مخرج الماتش محمد نصر الدين.
الأهلي والغندور ورسالة ضمنية للرجاء عن طريق الاتحاد الأفريقي
في رد فعل قوي تاني من الأهلي، وجه النادي خطاب للاتحاد الأفريقي لكرة القدم أشار فيه للعلاقة المتميزة بينه وبين الرجاء المغربي، الأهلي قال في خطابه “تلاحظ خلال الساعات الماضية أن هناك أطرافًا أخرى لا تعنيها علاقة الترابط بين الأهلي والرجاء، ولا الضوابط الرياضية، ولا السلامة، ولا خروج المباراة بالشكل اللائق. وتحاول هذه الأطراف من خلال بعض وسائل الإعلام والسوشيال ميديا بث الشحن الزائد حول كل العوامل المحيطة بالمباراة، والتأثير على ردة فعل الجماهير والحكام وسلامة الفريقين.”
الرسالة واضح من صياغتها القوة والمباشرة في توجيه رسالة مهمة للكل بعد كلام الغندور.
تصعيد تاني من الأهلي
محمد الجارحي، عضو مجلس إدارة الأهلي، نشر على صفحته على فيسبوك طلب إحاطة موجه لرئيس المجلس الأعلى للإعلام ووزير الشباب والرياضة بخصوص خالد الغندور .
“الأطراف غير المعنية تشاهد في صمت”
محمد سراج الدين، عضو مجلس إدارة النادي الأهلي، برضه نشر رسالة لخالد الغندور على فيسبوك، وقال “على الأطراف غير المعنية مساندة من تريد باحترام فهذا حقها أو المشاهدة في صمت إلى أن يتسنى لهم المشاركة في قلب الحدث”.
وهنشوف في الساعات الجاية إذا كان ده آخر تصعيد في الموضوع.