فيديو انتشر اليومين اللي فاتوا في الإسكندرية، في نادي المهندسين، في الفيديو بتظهر أمواج البحر في حالة غير مستقرة و بتغرق المكان بشكل يخض، واتسببت المياه في غرق ساحة الانتظار والاستراحة الخارجية والمكاتب المطلة على شاطئ البحر في النادي حسب اللي نشره موقع “بوابة أخبار اليوم”. وده أثار قلق الناس وانطلقت تحذيرات ومخاوف من “نوة قاسم” اللي هتضرب الإسكندرية بطقس غير مستقر، إيه هي نوة قاسم والمتوقع إنها تغيره في الطقس؟
نادي المهندسين بـ الإسكندرية – النهارده
نستعد لنوة قاسم 😒
BY: Anas Abbas 🎥Posted by Amir Mansour on Wednesday, December 1, 2021
نوة قاسم هتتسبب في ارتفاع الأمواج لحوالي 5 أمتار في منطقة لوران والجمرك ومنطقة المكس والمنتزه. ومن المتوقع بدايتها من النهارده، واستمرارها لمدة 5 أيام، وهتكون موجودة على الإسكندرية فى صورة رياح جنوبية غربية وعواصف شديدة. ودرجات حرارة منخفضة وجو بارد، وأكطار متوسطة على فترات متقطعة، وممكن تمتد النوة لشرق البلاد، حسب تصريحات محمود شاهين، مدير عام مركز التنبؤات بهيئة الأرصاد الجوية.
التوقعات بتخفف قلق السكان وبتقلل دواعي الخوف والترقب بحدوث كارثة غير متوقعة وغير مسبوقة زي ما بيتم التداول على السوشيال ميديا، في الوقت ده من السنة طبيعي المحافظة بتتعرض لأكتر من نوة، باختلاف الطقس اللي بتسببه، لكن بيتم أخذ الاحتياطات ورفع درجة الاستعداد لتجنب أي مشاكل تحصل بسبب سوء الأحوال الجوية.